Fahombiazana ny andiany voalohany tamin’ny fifaninanam-pirenena an-tsekoly ho an’ny taranja tolona. Navitrika ireo mpianatra tamin’ny fandraisana anjara. Azo antoka ny ho mpandimby ireo zoky, ary mety hanana ekipam-pirenena matanjaka i Madagasikara atsy ho atsy.
Notanterahina ny sabotsy lasa teo, tao amin’ny Kianja Ankoay Ankorondrano, ny fifanintsanana nasionaly amin’ny taranja tolona, eny anivon’ny sekoly. Fifaninanana, nokarakarain’ny Federasionina malgache de Lutte (FML). Azo lazaina ho nahomby ity hetsika andiany voalohany ity, raha ny nambaran-dRaveloson Mamitiana, filohan’ny federasionina satria navitrika ireo mpianatra nandray anjara tamin’izany. Nahatratra 200 mahery mantsy ireo kilonga madinika avy amin’ ireo sekoly miankina sy tsy miankina amin’ny fanjakana namaly ny antso.
Nozaraina tao anaty sokajy U12, U15, U17, lahy sy vavy, izy ireo. Tsy nanafina ny hafaliany ny mpitantana ny FML fa tratra ny tanjona raha amin’izao fanombohana izao. Notsiahiviny fa tafiditra ao anaty fampiroboroboana ny taranja tolona ny hetsika. Natao hitiliana ireo taninketsan’io taranja io eto Madagasikara, ihany koa. Nisy ny fanofanana nomena ireo mpampianatra amin’ny taranja fanatanjahantena, tany amin’ ireo sekoly nomen’ny teknisianin’ny federasionina mialoha ity fifaninanam-pirenena ity. Tamin’izany no nanaovana tomban’ezaka.
Notsiahivin-dRaveloson Mamitiana fa efa enim-bolana teo izay ry zareo no nanao fifampizarana traikefa tamin’ ireo mpanabe teny anivon’ireo sekoly eto an-drenivohitra sy tany amin’ny faritr’i Vakinankaratra. “Tsy mijanona eo amin’ ny fifaninanana an-tsekoly ihany izy ity fa hampidirina tsikelikely any anaty klioba ireo mpianatra ka ho lasa tena atleta matihanina”, hoy izy. Notoloran’ny federasionina amboara sy medaly avokoa ireo mpandresy tamin’ity.
F.R
French