Nanatanteraka hetsika iraisam-pirenena teto an-dRenivohitra momba ny zon’ny vehivavy ny Nifin’Akanga. Nizara telo ny asam-bondrona tamin’izany.
Nidinika niaraka ny mpitondra fivavahana sy ireo oloben’ny fiarahamonina momba ny fahitan’izy ireo ny zon’ny vehivavy sy ny finoana. Voaresaka tao ny fanolanana, araka ny voalaza ao anatin’ny Baiboly sy ny Coran. Tao koa ny fanapahan-kevitra tokony horaisina manolona ny filazana fa ny mpitondra fivavahana sy ny fivavahana no tsy manaiky fampitsaharana ny vohoka. Satria, tsy mifanaraka amin’ny fivavahana sy ny fomba fisaina malagasy izany. Niasa momba izay izy ireo ary hamoaka torolalana hozaraina amin’ny rehetra, araka ny fanazavan’ny mpanorina ny hetsika Nifin’Akanga, Raveloarimisa Mbolatiana.
Ireo mpisolovava sy ny mpitsara kosa hivondrona hametraka tambajotra hiaro ny zon’ny vehivavy sy hanosika ny fanovana ara-dalàna amin’ny fiarovana izany. Adihevitra hitondra fivoarana hanatsarana izany zo izany no niseho tao anatin’ny oniversite feminista.
Nisongadina tamin’ny firenena afrikanina sy aty amin’ny ranomasina Indianina nanatrika ny fivoriana fa i Madagasikara irery no tsy manaiky ny fampitsaharana vohoka noho ny antony medikaly (ara-pahasalamana). Rehefa nozohina anefa ny Baiboly sy ny Coran ary ny soatovaina malagasy, mipetraka ny hoe zava-dehibe ny fiarovana ny vehivavy mila fampitsaharana ny vohoka ara-medikaly.
Nahafahana nijery amin’ny fomba miabo sy fijery maro samihafa ny ady tokony hatrehina (ho an’ny zon’ny vehivavy) ny fandraisan’i Madagasikara ny fivoriana iraisam-pirenena voalohany momba ny rariny ara-tsosialy manome lanja ny vehivavy. Indrindra indrindra ny fampitsaharana ny vohoka noho ny antony ara-pahasalamana (ITG). Nanana fitaovana entina hiady hevitra handresy lahatra ireo tokony hanova lalàna ny mpivory.
Vonjy
French