Naneho ny heviny momba ny fahitany ny raharaham-pirenena ny depiote Randrianasolo Nicolas. Azon’ny mpanao politika atao ny mitsikera. Tsy tokony hiteniteny foana kosa anefa momba ireny dian’ny filohan’ny Fanavaozana, ny Kly Randrianirina Michaël, tany ivelany ireny.
“Sarotra ho ahy ny hangina manoloana ny zava-misy eto amin’ny firenena, indrindra ny fanenjehana ny filohan’ny Fanavaozana ny Repoblikan’i Madagasikara (PRRM), ny Kly Randrianirina Michaël. Mahazo miteny izay tiany ho tenenina ny mpanao politika na mitsikera fa tsy miteniteny foana, indrindra momba ireny diany tany ivelany ireny”, hoy ny fanazavan’ny depiote Randrianasolo Nicolas. Nitodika manokana tamin’ireo GenZ ity mpanao politika ity ka nametra-panontaniana hoe: “ Inona no tena tadiavinareo GenZ? Tsy hainareo ny tena niaingan’ny GenZ?”. Nambarany fa tsy izay miteny etsy sy eroa no atao hoe GenZ. “Mpikarama an’ady ianareo GenZ fa tsy tia tanindrazana araka ny tolona natao teny an-kianja. Toy ny manao fandrahonana amin’ny fanjakana ianareo”, hoy izy. Nohamafisiny hatrany ny antso amin’ny mpitondra fanjakana, izy tokony ho mafy, satria olon’ny fitondrana teo aloha ihany ireto mitonona ho GenZ ireto. “Mafy ny seraseran’ny filoha telo aloha, Andry Rajoelina, ka tokony hafainganina ny fanadihadiana azy. Tsy tokony hitsoaka izy raha tena nadio ny fitantanany ny firenena”, araka ny nambarany hatrany.
Aleo ny Filoha handinika
Tsy mifanaraka amin’ny sata maha miaramila sy amin’ny maha dokotera azy ireny fihetsika ataon’ny Kly Rakotomamonjy Patrick ireny. Niantso ny filohan’ny Fanavaozana izy hifidy tsara izay olona hiaraha-miasa. “Aleo izy handinika izay olona tiany tendrena ho Praiminisitra. Mambotry firenena ny ataon’ny politisianina sasany eto amintsika. Tokony hieritreritra isika fa tsy ny hanakorontana foana”, hoy hatrany ity olom-boafidy ity.
“Ny fijoroan’ny Kly Randrianirina Michaël no nampirodana ny fitondrana Rajoelina. Noho izany, andraiso fepetra ireo olona manao sy/na minia manao fanakorontanana eto amin’ny firenena”, raha ny nambarany hatrany. “Tsikaritra fa tena mangina tsy miteny ireo manamboninahitra efatra mpanolotsaina ny filoha, nefa tokony mba hijoro hanohana ny fitondrana izy ireo”, hoy izy namarana ny tafa tamin’ny mpanao gazety, teny Antaninarenina, omaly.
Jean Claude
French