“Tsy ny Kaominina Antananarivo Renivohitra ihany no haverina ny fifidianana, fa misy maromaro. Miankina ny finiavana sy ny fahafaha-manaon’ny fanjakana io.” Izay ny nambaran’ny filoha nasionalin’ny KMF/Cnoe Fanabeazana olom-pirenena, i Namearison Robert, tany Morondava, ny faran’ny herinandro teo, ny amin’ny famerenana fifidianana kaominaly amin’ny ampahany. Raha ny fanazavan’ny Ceni, tsy azo tanterahina ny famerenana ny fifidianana raha tsy aorian’ny sivy volana. Nefa miankina amin’ny tetibolam-panjakana izay.
Mba tsy hampitarazoka ny raharaha, tsara ny fanendrena filohana delegasionina manokana (PDS). Izay ny mora indrindra amin’izao toe-draharaha izao. Marina fa tsy demokratika izay. Amin’ny kaominina tsy misy PDS sady tsy misy ben’ny Tanàna no isiana fanararaotana be indrindra ary mampijaly ny olom-pirenena amin’ny fisitrahany ny zony. Iza no manao inona eny amin’ny kaominina? Tsy misy mpanao sonia: ahoana ny karaman’ny mpiasa, ahoana ny raharaha andrasan’ny olom-pirenena amin’ny kaominina… ? Ny fanendrena PDS no fanapahan-kevitra tsara indrindra dia manomana fifidianana. Raha ny toe-draharaha teo aloha, tapitra ihany ny fe-potoam-piasana fa tsy nisy fifidianana naverina. Tsy misy PDS sady tsy misy ben’ny Tanàna ny kaominina tokony hamerenana fifidianana. Tokony hazava ny fanjakana amin’izay ataony ny amin’izay: tena hamerina fifidianana ve? Aleo lazaina… Na aleo tendrena ny PDS.
Efa herintaona aty aoriana vao mivoaka ny fanapahan-kevitra. Lasa mampiahiahy ny amin’ny tsy fitanilan’ny fitsarana izany. Tena ao anatin’ny fahaleovantena ve ny fitsarana? Tsy manontany ny amin’izay fanapahan-kevitra mivoaka, fa ny fotoana namoahana an’izay. Nivoaka ve, ohatra, izay didy izay, raha tsy niongana ny fitondrana teo aloha?
R. Nd.
French