Ny atao hoe zava-banona, milamina sy mirindra ary tontosa soa aman-tsara. Mifanohitra amin’ilay tsy misy zava-banona. Azo sary an-tsaina ho an’ity farany fa misavoritaka ary mifanipaka toa valala an-karona. Raha amin’ny olombelona indray ny olom-banona, olona tsara taiza, mahitsy amin’ny zavatra atao ary azo itokisana raha hanankinana andraikitra. Mazava ho azy fa ny olon-tsy vanona izany, mpikiliolio sy tia kely. Tsy azo ianteherana fa mpamarina an-kady.
Eo amin’ny fiainana ara-panatanjahantena, mitoetra io teny vanona io. Misy mantsy ny vanona fa tsy vonona. Ao ireo mpitantana, na mpanazatra na mpitsara na mpanohana ekipa sy atleta, tena vanona tokoa saingy tsy vonona. Ao aminy ilay toetra tsara tadiavina amin’ny fampandrosoana ny taranja saingy tsy manana fahavononana amin’izany izy ireo. Mety ho antony maro ny tsy mamparisika ka tsy maha vonona ireo olona ireo. Tsy te hiara-kiasa amin’ny kamo, tsy vonona satria misy ny mpampirisika fotsiny na tsy te handany andro sy fotoana amin’ny taranja hitany fa tsy ho lasa lavitra.
Ankoatra azy ireo, ao ireo vonona saingy tsy vanona. Manana fahavononana tanteraka amin’ny andraikitra ampanaovina fa misy indro kely hatrany. Tsy maintsy mijery ny tombontsoany aloha, mikatsaka mandrakariva izay ho any am-paosiny ary maka ampahany betsaka amin’izay tsy anjarany satria olon-tsy vanona.
Samy tsy misy azo antenaina izany ny vanona fa tsy vonona sy ny vonona fa tsy vanona.
Ny hany andrandraina, olona vonona sady vanona. Saro-tadiavina toy ny gisa mainty izy ireny ka mila tandrovina fatratra toy ny anakandriamaso. Ny tanàna mantsy tsy hilaozan’olon-kendry sy vanona ary vonona.
Tompondaka
French