Tahaka ny fanaony isan-taona. Hanamarika ny Noely ny Chorale Orimbato avy ao amin’ny FJKM Tranovato Ambatonakanga. Hisy hatrany ny maha samihafa ny seho tsirairay.
Hira manamarika ny andro Noely, amin’ny teny malagasy, frantsay sy anglisy, miaraka amin’ny fitafiana manokana. Ireo no anisan’ny hampiavaka ity Antsa Noely « Misandrata » atolotry ny Chorale Orimbato avy ao amin’ny FJKM Tranovato Ambatonakanga ity. Antsa ankinina amin’ny Soratra Masina ao amin’ny bokin’ i Joba 22 :29 « Misandrata ; fa ny manetry tena hovonjeny ». Seho miavaka hotanterahina ny alahady 22 desambra izao, manomboka amin’ny 3ora sy sasany ao amin’ny FJKM Tranovato Ambatonakanga ihany.
Hisy fizaram-potoana roa izay anarahin’ireo mpitendry zavamaneno samy manana ny maha izy azy avy, ireo hira voafantina.
Ao ny hira litorjika nalaina tamin’ny fihirana FFPM toy ny « Injany hiran-danitra » FFPM 64, noforonin’i Edmund Sears tamin’ny taona 1849 (It came upon the midnight clear). Eo koa ny hira krismasy fahiny « Ding Dong merrily on high » tamin’ny taonjato faha XVI nasian’i George Ratcliffe Woodward tononkira tamin’ny taona 1924. Ary ny hira tena mahazatra amin’ny vanim-potoanan’ny Noely, tahaka ny « Il est né le divin enfant », hira noely frantsay tamin’ny taona 1818.
Nofidin’ny Chorale Orimbato ho an’ny hira malagasy kosa ireo fandre amin’ny andro Noely toy ny «Iriko ianao ry Noely» an’i Bessa (1970), « Tanàna kely » an’i Daniel Ramarokoto (1980), sns. Ireo hira fanandratana ny mpanjaka teo amin’ny fanjakana anglisy (Coronation Anthem) « Mampiboiboika ny foko » (My heart is inditing) (HWV 261) sanganasan’i G.F Haendel.
Ny « Des milliers de voix », (O for a thousand tongues) (Continental Singers UK) kosa no hanakatona an’ity Antsa Noely ity. Marihina fa tsy misy ny vidim-pidirana ho an’ny « Misandrata ».
HaRy Razafindrakoto
French