Hatramin’izao, mbola manana akony matanjaka ao amin’ny firenena voazanaka ireo foto-panabeazana napetraky ny mpanjakazaka an-tanin’olona. Tazana mivandravandra be izany eo amin’ny fiarahamonina malagasy. Anisan’ny ianjadian’io mafy ny kolontsaina sy ny kolo saina eto Madagasikara. Toe-tsaina sy fomba fisainana tia manindrahindra ny an’ny vahiny. Raha izao no mitohy, tsy ho voasanda vola ny fanarenana ny lesoka…
Anisan’ny nampidi-kizo ity firenena ity ny fampiasana teny mirakitra ozona ninian’ny mpanjakazaka an-tanin’olona novoizina hatramin’izao. Noraisin’ireo Malagasy marivo salosana ho voninahitra sy rehareha rahateo izy ireny ka vao mainka nandaitra araka ny niheveran’ny vahiny azy. Ohatra vitsivitsy : i Frantsa nolazaina fa « reny malala ». Izay baiko nomeny na ny nampitainy tamin’ny alalan’ireo forongony, novaliana « oui monsieur » avokoa na efa hita izao aza fa tsy mifanaraka amin’ny maha Malagasy sy amin’i Madagasikara. Ny fifanaovam-beloma izay mifono firariantsoa goavana be manao hoe « Veloma ny aina ! », nopotehina tamin’ny « Au revoir » izay notefitefena ka lasa « mandrapihaona ». Midika inona manoloana ny tsodrano « Veloma ny aina » anefa ny hoe : « mandrapihaona » ?
Nanjary potika sy tsy fantatry ny Malagasy intsony izany hasina sy herin’ny teny izany. Rehefa hisaraka (vetivety na ho fotoana ela) ny Malagasy, tsy maintsy manome na mifanome tsodrano. Tsy misy ilany ny « Au revoir » sy ny « Bye, bye » izany akory na kely aza. Ota fady ho an’i Madagasikara ny fitenenana azy ireny sady fanaovana tsinontsinona ny maha izy azy ny Malagasy (tany, teny, fomba, kolontsaina, …) rahateo. Zava-doza no miandry ny Malagasy sy i Madagasikara atsy ho atsy raha tsy mitandrina fatratra satria any amin’ny zaza sy ny tanora no tena mandaitra be ireo tranga ireo.
Raha ny fanambaran’ny Unesco no iaingana : … Tsy handroso velively i Madagasikara…
« Tsy misy firenena iray handroso eto ambany masoandro raha mbola ny tenin’ny firenen-kafa no entiny manabe ny taranaka ao aminy », hoy ny fanambaran’ny sampandraharahan’ny Firenena mikambana misahana ny kolontsaina sy ny fanabeazana na ny Unesco. Ka maninona no manao tsy omby aloha ny Malagasy mampiditra ny zanany hianatra any amin’ireo sekoly manabe amin’ny fiteny vahiny ? Efa midika izany fa tsy handroso velively ity Madagasikara ity raha tsy misy fepetra matotra hoenti-manabe sy mitaiza ary mampianatra ireo taranaka malagasy.
Hovidian-dafo tsy ho ela ny vokatr’io fanononan’ny taranaka malagasy : « papa sy maman » io, satria efa mamboly toe-tsaina hafa sy mivaona amin’ny lamina voajanahary maha Malagasy ao amin’ny zaza ny fitenenana izany. Fiheveran-tena ho « vazaha », « ambony noho ny hafa», « tsy Malagasy intsony », « manam-pahaizana sy be fahalalana », « fireharehana », « fanitsakitsahana ny hafa », « fananana fomba amam-panao vazaha »… Tsy ho voasanda vola ny fanarenana ny voka-dratsin’ny famerimberenana ny fitenenan’ny taranaka malagasy ny « papa sy maman » sy ireo iray tarika aminy. Iray amin’izany ny tsy fahalalan’ny Malagasy sasany intsony ny momba azy. Very tanteraka ilay fitiavan-tanindrazana satria tsy fantany intsony fa Malagasy izy ary azy manontolo i Madagasikara !
HaRy Razafindrakoto
French