Ny boky, loharano tsy ritra. Na eo aza ny firoborobon’ny teknolojia, tsy mbola takona ny vakiboky. Porofon’izany ny fitombon’ny filan’ny mpamaky boky eto Madagasikara, amin’ny sokajin-taona rehetra. Noho ny fahatsapana izay, nanome boky miisa 882 ho an’ny Tranombokim-pirenena malagasy ny fikambanan’ny firenena mampiasa ny teny frantsay (OIF), ny masoivohon’i Frantsa ary ny masoivohon’i Soisa.
Lanonana tsotsotra fa manan-danja no nanamarihana izany, tetsy amin’ny foiben’ny Tranombokim-pirenena Anosy, omaly. Boky mamaly ny filàn’ny mpamaky any amin’ny tranomboky avokoa mantsy ireo, ary tsy natao ho an’ny foibe ihany fa hiparitaka manerana ny Nosy, any amin’ny rantsa-mangaika rehetra. Fanohanana ny rohim-boky eto Madagasikara ihany koa, satria ny 767 amin’ ireo boky 882 ireo dia natonta sy novidiana teto an-toerana avokoa. Misy amin’ny teny malagasy sy amin’ny teny frantsay, izay sanganasana mpanoratra malagasy sy vahiny ireo.
Samy naneho ny fahavononana amin’ny fanohizana ny fanohanana ny rohim-boky eto Madagasikara izay ireo solontenan’ny mpanolotra. Nanamafy kosa ny minisitry ny Serasera sy ny kolontsaina, Andriatongarivo Lalatiana Rakotondrazafy, fa efa nametraka ho laharam-pahamehana ny fampiroboroboana ny sehatry ny vakiboky ny minisitera, ary maro ireo tetikasa mikasika izany, toy ny “Ndao hamaky boky”. Notsiahivina omaly ihany koa, fa nandritra ny fihaonan’ny minisitra tamin’ny tomponandraikitry ny OIF tany Paris, ny volana febroary teo, no nanamafisana fa hisy ampaham-bola avy amin’ny tetibola omen’ny OIF no hividianana boky nosoratana mpanoratra malagasy, na natonta sy amidy eto Madagasikara.
Zo ny Aina
French