Vita ihany ! Tsy noteren-ko masaka anefa, fa narahin’i Bolo tamin’ny onjany teny. Nisy “Noana” ireo efa ela niandrasana, kanefa afa-po rehefa avy nianoka ny “Ravitoto”, rakikira voalohan’i Bolo.
Tsia, tsy resaka sakafo akory ilay « Ravitoto ». Eny, misy idirany ihany koa anefa… Rehefa noketrehina ela, masaka ny “Ravitoto”, rakikiran’i Bolo voalohany, izay nampahafantariny tamin’ny fomba niavaka ny faran’ny herinandro teo, tetsy amin’ny Chat’Ô Ivato. Vao niditra ny toerana dia ilay fafana misy ny lohatenin-kira, toa ny “sakafo anio” no nisintona ny maso voalohany.
Na ireo efa naheno ny mozikan’i Bolo aza, mbola nanontany tena ihany nandritra ny kilalao mozika nataon’ireo mpitendry, nialoha ny seho. Toa izany ve ny fofompofony? Raha tsy nandeha kosa ny “Samy hafa”, hira voalohany, tsy voavaly ny fanontaniana. “Toa misy manakaiky ny “Mausolée” an’i Backom ny fanombohan’ilay hira?”, hoy ny fanontaniana avy amin’i Tongue Nat. “Rehefa nandeha teny ny fiketrehana ny hira dia mety nisy izay fanakaikezana izay”, hoy i Bolo. “Samy hafa”, araka ny lohatenin’ny hira koa anefa: manana ilay fomba fanehoany ny mozikany azy manokana i Bolo.
Inona tokoa ny fonosin’ilay hoe “Ravitoto”? Mitantara kely ny fiainan’ity mpankanto ity ihany ilay hira. “Tsy ny hazo rehetra no lasa lakana, fa misy ny hazo mangahazo, izay hahazoana ravitoto, ary tsara koa izany…”, hoy ny fanazavana miaro fantsy, araka ny nahanfatarana an’i Bolo. Eny, anisan’ireo tsy nankasitrahan’ny ray aman-dreniny tokoa ny hoe hanao mozika fotsiny tany am-boalohany. Faly, nirehareha ary nitso-drano an-janany kosa anefa izy ireo, rehefa nangatahan’ny mpijery iray mba haneho ny heviny mikasika ny tohin’ny lalan’i Bolo.
Efa aman-taonany maro no nivoaka ny “Doudou”. Nanomboka teo no nahatsikaritra ny mpanaraka azy fa niroso lalina kokoa tamin’ny mozika i Bolo. Ilay fototra tany amin’ny rap, mbola ao ihany. Ireo zokibe “niondanany” toa an-dry Davy sy Tongue, nanatrika teo ihany koa. “18.3 sy Feo Gasy no kasety fihainoko tao an-trano…”, hoy izy. Namaritra kely ny fironany tao anatin’ny rakikira izany, raha maheno ny “Anamalaho” sy ny “Kompozé”, izay be mpankafy toa ilay sakafo ihany.
Mametraka ny anarany ary vao manomboka azy io i Bolo. Mpiray tsikombakomba nameno ny fepetra ireo mpitendry niaraka taminy, na tany amin’ny fandraisam-peo izany na teny an-tsehatra. Afaka manongilan-tsofina sy manjifa ny “Ravitoto” ihany koa amin’ireo “plateforme de streaming” izany rehetra liana. Izay mbola mila fanandramana kosa, afaka mijery ny rakitsary ao amin’ny “Youtube”…
Zo ny Aina
French