“Manana fandaharanasa isika izay napetraky ny filohan’ny Repoblika amin’ny fananganana indostria manerana ny distrika 119 eto Madagasikara. Mifanentana amin’izany tinady izany ny haitao indianina, ary tokony hojerena akaiky izay mba hahazoana miara-miasa amin’ny fanatanterahana izany”, hoy ny fanazavan’ny filohan’ ny Antenimierandoholona, Razafimahefa Herimanana, ny amin’ny fitsidihana ara-pomba fifanajana nataon’ny ambasadaoron’i Inde vaovao eto Madagasikara, Sem Bandaru Wilsonbabu, azy teny amin’ny lapan’Anosikely, afakomaly.
Nampanantena ny ambasadaoro fa maro ireo indianina mpandraharaha te hampiasa vola eto Madagasikara. Andraikitry ny Antenimierandoholona izay, araka ny voalazan’ny lalàmpanorenana. Tsy inona izay fa ny fanamorana ny fiaraha-miasa amin’ireo mpandraharaha na teratany na vahiny vonona hiasa eto Madagasikara. Nanome toky ny ambasadaoron’i India fa hijery akaiky ny amin’izay fiaraha-miasa ara-toekarena izay eo amin’ny firenena roa tonta.
Voaresaka ihany koa ny amin’ny fifanakalozana sy fifanomezan-tanana amin’ny fanatevenana ny amin’ny demokrasia koa ny parlemanta indianina sy ny Antenimierandoholona malagasy. Tsiahivina fa anisan’ny nanome tanana an’i Madagasikara tamin’ny fiatrehana ny ady tamin’ny fihanaky ny valanaretina covid-19 i India. Teo koa ny fanampiana tamin’ny fandalovan’ny rivodoza nifanesy.
R. Nd.
French