Izay rehetra namaky, voadona ny fo sy fanahy… Antony voalohany nampalaza ny boky « Mitaraina ny tany », nosoratan’i Andry Andraina. Antony faharoa, anisan’ireo boky tafiditra anatin’ny fandaharam-pianarana, ka ampiasain’ny mpianatra amin’ny kilasy taona faharoa izy ity. Nadikan’Andriamahery Raoelison Théophile Jean na i Tefy, tamin’ny teny frantsay ity boky ity. « De douleur, la terre gémit » ny lohateniny, izay nampahafantarina tamin’ny fomba ofisialy omaly, tetsy amin’ny efitrano Jaomanoro, Tranombokim-pirenena Anosy.
Tanjona voalohany amin’izany ny fanandratana ny literatiora malagasy, ka hikatsahana ny tsenan’ny boky any amin’ireo tany mampiasa ny teny frantsay. Eo koa ny fampahafantarana ny karazam-piainana nisy tamin’ny vanim-potoanan’ny fanjanahantany niainan’ny firenena maro taty Afrika. Lohahevitra maro, toy ny endri-panabeazana, ny fiaimpianan’ny vehivavy, ny fitiavan-tanindrazana, ny raharaha miaramila, sns, ihany koa no voaresaka anatin’ny boky.
Ny Edisiona Tsipika no namokatra ny boky, izay misy pejy 326 ary amin’ny endriny A5. Samy nanamafy ny maha zava-dehibe izany ireo nifandimby nandray fitenenana, omaly.
Mpampianatra teny vahiny nandritra ny taona maro, sady mpandika teny i Tefy. Nandray anjara sy nandika amin’ny teny hafa ireo bokim-pianarana ihany koa izy.
Zo ny Aina
French