Tranga mampalahelo! Raim-pianakaviana iray 35 taona no maty nanaton-tena tamina hazo afakomaly rehefa avy nifamaly tamin’ny vadiny. Omaly tokony ho tamin’ny 05 ora maraina hita faty nihantona tamin’ny tady teo ambony manga maniry teo amin’ny fefin-tranony ny vata-mangatsiakany. Monina ao Ambalamanga, fokontany Fenoariavo atsimo, kaominina sy distrikan’i Farafangana ny lehilahy. “Namono tena ny alin’ny alatsinainy hifoha talata teo izy rehefa avy nifamaly tamin’ny ramatoa vadiny”, hoy ny polisy ao an-toerana. Tokony tamin’ny 11 ora alina teo izy no niseho ity zava-doza ity, hoy hatrany ny fanazavana voaray. Voalaza ho manana olana ara-tokantrano ny lehilahy. Mirobaroba vola ramatoa vadiny no mbola mampirafy azy. Matetika mifamaly mihitsy izy mivady ireo noho ireo antony voalaza etsy ambony. Mateti-pitranga rahateo ny disadisa. Vokany, nandrahona ny hamono tena hatrany ity raim-pianakaviana ity noho ireo zava-niainany. Tamin’ity indray mitoraka ity, nataony izany na dia niezaka nanakana azy aza ireo zanany mianadahy.
Henintsoa H.
French