Dahalo 12 lahy mitam-piadiana tonga nanafika trano iray tao Ampiakarandava,distrikan’i Manandriana, ny zoma hariva teo. Lasan’izy ireo tamin’ izany ireo omby telo tao an-toerana. Nizotra niankandrefana ny dian’ireo dahalo rehefa azony ireo biby, raha ny fampitam-baovao. Niray hina ny fokonolona tao an-tanàna, ka nanara-dia avy hatrany. Nampandrenesina ihany koa ny zandarimariam-pirenena tao Ambatomarina sy tao Ambatofinandrahana mba hanampy ireo fokonolona. Nobahanana ireo kizo tao Analamosy, kaominina Vinany Andakantanetikely. Raikitra ny fifanenjehana teo amin’ny mpitandro filaminana ny mponina ary ireo dahalo. Vokany, maty ny mpanara-dia iray tamin’ireo fokonolona ny asabotsy hariva teo. Marihina fa faritra fehezin’ny Polisy ao Manandriana ireto kaominina nisehoana halatr’omby sy nahafatesana mpanara-dia ireto, araka ny tatitra nataon’ ny polisy tao Manandriana. Mbola mitohy ny fanadihadiana ataon’izy ireo.
Mino( Mpianatra Asa)
French