Voatafiky ny dahalo ny olona 11 tao anatin’ny fiara mpitatitra iray nandalo teny amin’ny lalam-pirenena faha-13 hihazo an’i Taolagnaro, afakomaly vao mangiran-dratsy. Nifanehatra tamin’ireo dahalo teo akaikin’ny “Centre Univesitaire régionale Ambovombe” ity fiara mpitatitr’olona ity. Nahazo antso ny zandary ao Ambovombe ka nidina ifotony. Miisa telo ireo dahalo nirongo fitaovam-piadiana toy ny basy sy ny antsy lava. “Tokony ho tamin’ny 03 ora sasany maraina teo no nitrangan’ny fanafihana”, hoy ny mpandeha. Raiki-tahotra ireo mpandeha ka nanaiky izay notenen’ireto dahalo ireto. Vokany, lasa ny vola efatra hetsy ariary tany amin’ny mpamily. Norobain’izy ireo koa ny finday teny amin’ireo mpandeha sy ny poketra. Marihina fa notoratorahin’ireto dahalo ireto ity taksibrosy ity. Ankoatra ny fandrobana, potika koa ny fitaratry ny fiara. Noho ny ratra nahazo azy, nentina eny amin’ny toeram-pitsaboana ny mpamily. Tsy misy nahiana kosa ny ainy taorian’io. Hanohy ny ezaka amin’ny fanamafisana ny ady amin’ny tsy fandriam-pahalemana eny amin’ny RN13 sy RN10 ny zandary.
Tsiferana R.
French