Voahosotra ho tompondakan’i Madagasikara 2022, eo amin’ny taranja Cross-country i Voninahitsy Clement, atletan’ny Cosfa Analamanga sy Rasoaniaina Nathalie avy amin’ny Cami Itasy. Araka izany, hisolo tena an’i Madagasikara amin’ny fiadiana ny ho tompondaka eran-tany hatao any Bathurst Aostralia, ny 18 febroary 2023 izy ireo. Ireo no vokatry ny fifaninanam-pirenena, notanterahina teny amin’ ny bout de piste Ivato, ny asabotsy lasa teo. Raha hiverenana ny fizotry ny hazakazaka 10 km ho an’ny “sénior” lahy sy vavy, vao teo am-piandohana, tsy niala tao anaty “peloton”
i Clement sy i Tsima ary i Patrick (Cosfa) i Mampitsoatse (Cospn Boeny), niampy an’i Fulgence (Crown Vakinankaratra). Na izany aza, hain’ireo atletan’ny Cosfa (Bebaoty) ny nampiasa ny fifandimbiasana tamin’ny hazakazaka ka nahavery an’i Mampitsoatse, vao teo amin’ ny 4 km nihazakazahana. Nanomboka teo dia efa niala tsikelikely ireo mpifanandrina taminy i Clement, ary tsy tratra intsony mandra-pahatonga tany amin’ny tsipiky ny fahatongavana. 32 mn 55 s ny fe-potoana nahavitany ny halavirana. “Mafimafy ihany ny niatrehana izany, saingy efa niomanana tsara. Porofon’izany, efa voalohany hatrany aho, tany amin’ny seksiona sy ny ligy ary nipaka hatraty amin’ ny fiadiana ny ho tompondakan’i Madagasikara. Tsy nampatahotra ahy loatra i Mampitroatse satria hita hoe efa tsy mety aminy intsony ilay halavirana fa any amin’ ny lavitra ezaka no talentany”, hoy i Clément.
Nandeha irery i Nathalie
Ho an’ny vehivavy, vao nanomboka dia efa nofehezin’ i Nathalie irery ny hazakazaka. Notarihiny hatramin’ny voalohany ka hatramin’ny farany ny hazakazaka. Na teo aza ireto vokatra ireto, tsy mbola montsana ny fe-potoana tsara indrindra eto Madagasikara. Nolazain’i Nathalie fa efa niomanana iny fifaninanana iny, taorian’ny “sur piste” ka iny nahazoana ny voalohany iny. Fangatahan’izy mianadahy ny hanampian’ny fitondrana azy ireo, manomboka eto satria voninahi-pirenena no arovana any Aostralia fa tsy ny klioba intsony.
Tsiahivina fa nisy mpifaninana avy any La Réunion, nandray anjara tamin’ity, izay nitsapa ny herin’ireo atletany, amin’ny fanomanana ny lalaon’ny Nosy 2023, eto Madagasikara. “Mila mailo isika fa mandady ny trambo. Tena mpifanandrina goavana ho an’ny Malagasy ny Renioney, ka tsy tokony hatoritory isika”, hoy Raherison Dominique, filohan’ny federasiona (FMA). Notsiahiviny fa fanokafana ny taom-pilalaovana 2023 iny fiadiana ny ho tompondakan’i Madagasikara iny.
Dingana manaraka ny fiatrehana ny hazakazaka mifampitohy, tanterahina atsy La Réunion, ny 17 sy 18 desambra, ho avy izao. Nahatratra 57 ny isan’ireo mpifaninana teo amin’ny “sénior” lehilahy raha 17 ny vehivavy.
Torcelin
Vokatra teo amin’ny “sénior” lehilahy
1-Voninahitsy Clement (Cosfa) – 32 mn 55 s 0
2-Ralaiarimanana Onja Patrick (Cosfa) – 33 mn 00 s 0
3-Rafanomezantsoa Jean Richard (Amoron’i Mania) -33 mn 23 s 2
“Sénior” vehivavy
1-Rasoaniaina Nathalie (CAMI Itasy) – 40 mn 41 s 1
2-Ralisinirina Marthe (3FB Analamanga) – 43 mn 05 s 3
3-Rafaherison Ange Noel (AS Fanalamanga) – 43 mn 47 s 6
French