Nandray ny filoha vaovao mitantana ny Fida, Alvaro Lario, ny filoha Rajoelina Andry, omaly, teny Iavoloha. Anisan’ny noresahan’ny roa tonta nandritra izao fihaonana izao ireo seha-piaraha-miasa eo amin’ny roatonta. Tafiditra ao anatin’izany ny fanatrarana ny fahavitan-tena ara-tsakafo, iarahana amin’ ireo tetikasa Defis, Formaprod, Cosop… “Fanamby ho an’i Madagasikara ny famokarana eto an-toerana ireo ilain’ny vahoaka amin’ny alalan’ny fampitomboana ny velaran-tany hamokarana sy ny taha-pamokarana”, hoy ny filoha.
Nambaran’ny filohan’ny Fida kosa fa hanamafy ny fiaraha-miasa amin’ny firenena Malagasy izy ireo.
Fampiroboroboana ny tontolo ambanivohitra
Anisan’izany ny fampiroboroboana ireo tetikasa miompana amin’ny fanatsarana ny fiatrehan’ny tontolo ambanivohitra, manoloana ny fiovaovan’ny toetrandro, ny fampiofanana ary ny fametrahana ireo fotodrafitrasa isan-karazany.
Tsiahivina fa sampan’ny Firenena Mikambana (ONU), mpiara-miombon’antoka amin’i Madagasikara amin’ ny fampiroboroboana ny fambolena sy ny fiompiana ary ny tontolo ambanivohitra efa hatramin’ny taona 1979 ny Fida.
Synèse R.
French