Mivory mandritra ny telo andro eto Madagasikara ny CIJ (Conseil International des Jeux). Naneho ny fahavononany handray ny lalaon’ny Nosy 2023 i Madagasikara, nandritra ny fanokafana ny fivoriana omaly, teny amin’ny Novotel Alarobia.
Efa fantatra avokoa ireo toerana sy kianja handraisana ireo taranja 23 hifaninanana ka nampahafantarina ny CIJ, omaly. Hiroso amin’ny fidinana ifotony hijery ireo fotodrafitrasa ara-panatanjahantena ireo anio ireo tompon’andraikitra tarihan’ny filohan’ny CIJ, i Anthony Gopal, hanamarina raha tena afaka handraisana lalao tokoa ireo toerana ireo. Raha ny tatitra nataon’ny teo anivon’ny Komity Olympika malagasy, faritra efatra eto Madagasikara ny handray ny lalao, Antananarivo, Mahajanga, Sainte Marie ary Faradofay na Toliara. Araka izany, hampiantrano ny baolina kitra sy ny volleyball lalaovina amin’ny fasika, ny volleyball klasika, ny Taekwondo, ny Karate ary ny lomano ho an’ny olona misy fahasembanana, ny any Mahajanga. Any Faradofay na any Toliara no hanaovana ny « Surf », any Sainte Marie ny voile. Ankoatra ireo, saika eto Antananarivo no mandray ny ambiny, ka eny Vontovorona ny taranja handball, badminton, ary ny baolina kitra. Etsy amin’ny kianja mitafon’Ankorondrano kosa ny Judo sy ny fibatana fonjamby. Eny amin’ny Lapan’ny Fanatanjahantena sy Kolontsaina Mahamasina, ny basketball rehetra sy ny tolona, etsy amin’ny ACSA Ambohidahy ny tenisy, eny amin’ny boulodrom6e Fitaratra Tongarivo Tanjombato ny tsipy kanetibe, eny amin’ny kianja Makis Andohatapenaka ny Rugby ary eo amin’ny kianjan’Alarobia ny Atletisma
Ho avy eto ny filohan’ny CIO
Nohamafisin’ny filohan’ny Komity Olympika Malagasy, Randrianasoloniaiko Siteny, fa ho avy eto Madagasikara mihitsy hanatrika ny lalaon’ny Nosy 2023, hatao eto amintsika, ny filohan’ny Komity Olympika Iraisam-pirenena, Thomas Bach. « Manoloana izany, ho hentitra amin’ny fanaraha-maso sy fitsirihana ny atleta, amin’ny fandraisana na fihinanana zavatra mampatanjaka ny mpikarakara ny fifaninanana amin’io », hoy hatrany ny filohan’ny KOM.
Nohamafisin’ny COJI , notarihan’ny filohany, Andriamatoa Tinoka Roberto, Minisitry ny Tanora sy ny fanatanjahantena kosa ny fahavononan’i Madagasikara, hampiantrano ity andiany faha-11 ity. Tonga nanatrika izao fivoriana izao avokoa ireo solontena avy amin’ny nosy mpandray anjara, nahitana an’i Maldiva , Kaomoro, Maorisy, Seysela, La Reunion, Mayotte ary i Madagasikara. Ho fantatra amin’ny fiafaran’ny fivoriana rahampitso kosa ny daty ofisialy hanaovana ny lalao.
Mi.Raz
French