Tsy miova fa horaisin’i Madagasikara, ny lalaon’ny Nosy 2023. Io no fantatra taorian’ny fitsidihana nataon’ireo mpikambana eo anivon’ny vaomiera iraisam-pirenen’ny lalao (CIJ), teto amin-tsika.
Nifarana, omaly, ny fivoriana nataon’ny CIJ (Conseil International des Jeux), teto Madagasikara. Afa-po ny filohan’ny CIJ, i Anthony Gopal ary nahita ny fahavononan’i Madagasikara, amin’ny fotodrafitrasa sy ny fanomanana amin’ny ankapobeny, ny lalaon’ny Nosy hotanterahina eto Madagasikara ny taona 2023. Nitsidika ireo toerana rehetra handraisana ny lalao izy ireo, niaraka tamin’ny delegasiona avy amin’ ny Nosy rahavavy handray anjara. Efa avy nitsidika ny tany Mahajanga sy ny teny amin’ny Cnaps Vontovorona, ny alakamisy lasa teo ary nofaranana tetsy amin’ny kianja Barea Mahamasina izany fitsidihana izany. Nandritra izany no nanehoan’ny CIJ sy ireo Nosy rahavavy ny fahafaham-pony ka nanamafy fa afaka mandray tsara ny lalaon’ ny Nosy i Madagasikara. “Ampy tsara ny fotodrafitrasa ary mbola manana safidy betsaka aza”, hoy ny nambaran’ny filohan’ny CIJ, i Anthony Gopal. Tetsy ankilany, nanome toky ny filohan’ny Komity olympika malagasy, Randrianasoloniaiko Siteny fa hojerena ireo fotodrafitrasa mbola mila hatsaraina ary hovitaina haingana ireo izay vao eo an-dalam-panamboarana. Hizotra tsara, hoy izy, ity lalaon’ny Nosy 2023 andiany faha-11 hatao eto Madagasikara ity. Ny lisitry ny delegasiona sy ny atleta avy amin’ny Nosy mandray anjara sisa no andrasana hahafahana mandamina ny toerana hivantanan’izy ireo. Mbola misy fanamboarana ihany koa ny mahakasika ny fitsipika teknika isaky ny taranja.
Tsiahivina, ny volana avrily 2023 izao indray ny hanatanterahana ny fivorian’ ny CIJ manaraka, handaminana farany ity lalaon’ny Nosy 2023 ity.
Mi.Raz
French