Taorin’ny hatairana saika niteraka rarin-tsaina ho an’ilay renin’ny tovovavy kely niasa ka namoy ny ainy teto an-dRenivohitra ny 02 janoary teo. Efa mihatsara ny fahasalaman’ io ramatoa io amin’izao fotoana. Sahirana ara-pivelomana, nalefan’ny reniny avy any Miarinarivo hiasa tamin’ny olona teto Antananarivo io tovovavy 15 taona, atao hoe Anja io. Tsy tamana anefa izy saingy nandà izany ny reniny noho ny tsy fananana, izy rahateo kamboty. Narary tampoka izy ny andron’ny 02 janoary ka nentin’ny mpampiasa azy teny amin’ny hopitaly Anosiala. Tsy tana anefa ny ain’ity farany. Nentin’ny mpampiasa azy nihazo ny tany niaviany ny vatana mangatsikany. Naharay antso ny reniny mba hitsena azy teny amin’ ny fiantsonan’ny taksibrosy. Kinanjo, efa vatana mangatsika ny zanany no tao anaty vata no novantaniny. Niditra an-tsehatra nanao ny fanadihadiana ny anton’ny fahafatesan’ io tovovavy io ny zandary. Voamarin’ny mpitsabo nanao ny fizahana fa maty natoraly i Anja. Notanan’ny zandary natao fanadihadiana ny mpamily ny fiara nitondra ny razana sy ireo mpampiasa ity tovovavy namoy ny ainy ity. Mbola tsy nalevina ny razana fa miandry ny voka-panadihadiana.
Tsiferana R.
French