Trano miisa 12 indray kilan’ny afo tao Bemiditra, fokontany Ambalakazaha Avaratra, kaominina sy distrikan’i Manakara, afakomaly. Raha ny tatitra nampitain’ny zandary, fipoahanana herinaratra tao amina tokantrano iray nihidy no niantombohan’ny afo. Voalaza fa lasa nanao fety tany an-toeran-kafa ny tompon-trano sy ny fianakaviany, kanjo hotohoton’ny afo tanteraka ny trano. Vokany, trano miisa 12 indray may. Trano valo voatery tsy maintsy narodana mba tsy hitaran’ny afo teo amin’ny manodidina. Olona miisa 150 mitsinjara ho fianakaviana 35 traboina. Efa tamin’ny 6 ora hariva vao voafehy tanteraka ny afo, saingy mbola mitohy ny famonoana ny afo niarahan’ireo mpitandro filaminana sy ny fokonolona ao an-toerana. Raim-pianakaviana iray naratra teo amin’ny tanany vokatry ny fikoropahana tao anaty fahamaizana ka efa nahazo fitsaboana sahaza azy tany amin’ny hopitaly. Mitohy ny fanadihadiana ataon’ny zandary momba ity raharaha ity.
Jean Claude
French