Notanterahina omaly, teny amin’ny kianja Makis Andohatapenaka ny fampiofanana ireo mpitsara ambony latabatra na « commissaire au match » miisa sivy, izay fito lahy sy roa vavy. Ny Word Rugby no mampiofana ireo mpitsara sivy mianadahy ireo. Araka ny fanazavan’ny tale teknika nasionalin’ny Malagasy Rugby, natao hampivoarana ny fomba fitsaran-dalao ity fiofanana ity. Amin’ny lalao “Super Coupe”, izay atao eny amin’ny Kianja Makis, ny alahady ho avy izao, no hanaovana ny andrana voalohany ho azy sivy mianadahy.
Ankoatra izay, efa nanomboka tamin’ny alarobia lasa teo kosa ny fitsapam-pahaizana ho an’ireo mpanazatra, miisa valo, izay haka ny mari-pahaizana ambaratonga faharoa na “niveau 2”. Ilay tomponandraikitra amin’ ny fiofanana ao amin’ny Africa Rugby, Charles Yapo no mampiofana sy manao ny tomban’ezak’izy ireo. Marihina fa raha mahazo an’io diplaoma io izy ireo, afaka manazatra klioba sangany eto Madagasikara, raha toa ka ny diplaoma “niveau 3” no takina raha hanazatra ekipam-pirenena.
Ankoatra izay, misy ny fitsidihana ny kianja sy ny fanaraha-maso ny asan’ny Malagasy Rugby, izay ataon’ ny Word Rugby, eto amintsika, eo koa ny fijerena ny fizotran’ny fifaninanana eto Madagasikara. Tsiahivina fa mialohan’ny lalao “Super Coupe”, hisy ny fivoriana ara-teknika izay ataon’ny Malagasy Rugby, ny asabotsy ho avy izao.
Fitia (Mpianatra asa)
French