Vita, omaly, ny fifamindram-pahefana teo amin’ny minisitra teo aloha, nisahana ny Fitaterana sy ny famantarana ny toetr’andro (MTM), Ranjatoelina Rolland, sy ny mpandimby azy, Ramonjavelo Valéry. Nohamafisin’ity farany fa ho jereny akaiky ireo seha-pitaterana manan-danja rehetra, mifanaraka amin’ny vinan’ ny filoham-pirenena.
Isan’izany ny fitaovana entina hanatsarana ny foibe famantarana ny toetr’andro. Mikasika ny fitaterana ana habakabaka, efa natomboka ary tohizan’ny minisitra Ramonjavelo Valéry ny tetikasa ASSR (Aire de service, de sécurité et de repos). Eo koa ny fampivoarana ny Madagascar Airlines.
Lalamby ankapobeny
Ho an’ny lalamby, hojerena manokana ny zotra Fianarantsoa-Manakara (FCE) sy ny fitaterana an-dalamby ankapobeny. Isan’izany ny fitaterana an-dalamby an-tanàn-dehibe (train urbain), miampy ny fitaterana mihantona « teleferika », napetraky ny filoha.
Nomarihin’ny minisitra vaovao, fa « vonona hiasa eny ifotony aho. Mila hamafisina ny fiaraha-miasa amin’ny minisitera hafa mifampiankina amin’ny MTM ».
Ho an’ny minisitra teo aloha, Ranjatoelina Rolland, tanjony amin’ny maha filohan’ ny filankevim-pitantanan’ny Asecna azy ny hamerina ity sampandraharaha iraisam- pirenena ity ho orinasa afrikanina satria mpiara-miombon’antoka afrikanina no miahy azy fa tsy an’i Frantsa.
Njaka A.
French