Misokatra ny vatsim-pianarana avy amin’ny Sampandraharahan’ny Firenena Mikambana misahana ny siansa sy ny kolontsaina, Unesco, ho an’ity taona ity. Natokana ho an’ny tanora siantifika, anatin’ny fandaharanasa miompana amin’ny olombelona sy ny tontolony izy io na ny vatsim-pianarana MAB.
Tanjona amin’io vatsim-pianarana io ny fampirisihana ny tanora siantifika, indrindra ireo tanora aty amin’ny tany an-dalam-pandrosoana, mba hikaroka miompana amin’ny tontolon’ny aina sy ny maha olona.
Kendrena ny fahafahan’ny tanora mampiasa ny sehatra hiasan’ny tetikasa samihafa izay ahitana taratra ny toerana hisian’ny aina: anaty rano, tany rivotra ary ny biosfera.
Omena sehatra ny tanora siantifika izay vonona hanao ny fikarohana hampitovy ny zava-misy iainany ao amin’ny firenena misy azy sy ny zava-misy any amin’ny firenen- kafa.
Anaty fikarohana koa ny fifanakalozana ny tsara ho fantatra sy ny traikefa eo amin’ny samy tanora siantifika hatrizay sy ny vao misandratra.
Ny vatsim-pianarana amin’ ity taona ity dia mahakasika ny tontolon’ny ranomasina sy ny moron-dranomasina, izay ahitana ny tahirin’ny biosfera.
Afaka mandray anjara amin’ny fangatahana ity vatsim-pianarana ity ireo tanora latsaky ny 35 taona, mahafeno ny antontan-taratasy takina, toy ny vokatry ny fikarohana efa nataony momba ny biosfera. Vonona ny hampihatra ny drafitrasa anatin’ny fifanarahan’i Lima sy vonona hikaroka momba ny fampandrosoana maharitra lovain-jafy ihany koa.
5000 dolara amerikanina no vatsim-pianarana ambony indrindra ho azo amin’izany. Ny asa fikarohana kosa dia tsy maintsy vita anatin’ny roa taona.
Anisan’ny fepetra takina koa ny hoe: ny tanora nanao ny fikarohana dia tsy maintsy manao tatitra an’io voka-pikarohany io amin’ny komity nasionaly misahana ny vatsim- pianarana, MAB sy amin’ny mpamatsy ny vatsim-pianarana avy amin’ny MAB, ao Paris.
Ny 27 marsa izao no daty farany fanaterana ny antontan-taratasy rehetra, etsy amin’ny Unesco Behoririka, ho an’ izay tanora siantifika liana amin’ny fikarohana momba ny biosfera.
Tatiana A
French