«Fotoana izao hanafoanana ny tazomoka : milofosa, mitadiava paikady vaovao, miasà». Lohahevitra voizina mandritra ny fanamarihana ny Andro maneran-tany iadiana amin’ny aretina tazomoka, ny 25 avrily ho avy izao.
Nanazava ny teknisianina avy ao amin’ny minisiteran’ny Fahasalamam-bahoaka, Ramandimbiarijaona Herizo, fa hiompana amin’ny famendrahana odimoka amin’ireo distrika 5 mbola ahitana ny tazomoka ny hetsika.
Anisan’izany ny distrikan’ Isandra, Ivohibe, Iakora, Taolagnaro ary Ankazoabo. Hitety trano ireo tompon’andraikitra handraraka ny fanafody. Tsy azo andrarahana fanafody kosa ny tsena fivarotana sy ny sompitra fitehirizam-bokatra. Iarahana amin’ny mpiara-miombon’antoka, USAID PMI, ny fanatanterahana izany.
Manaraka ny fenitra fiarovana ny tontolo iainana ny fanafody ampiasaina. Efa voamarin’ny OMS rahateo izany. Karazam-panafody 3 no ampiasaina mba ialana amin’ny fahazaran’ny moka.
Hisy koa ny paikady fanampiny dia ny fanondrahana fanafody eny an-tanimbary amin’ny alalan’ny drone ho an’ny distrikan’Ankazobe sy Morombe. Andrana natao tao anatin’ny herintaona ka andrasana ny vokatra ankehitriny.
Hisy ny fanentanana ny olona amin’ny fanalana ny lobolobo sy ny fieren’ny moka. Anentanana ny vaomieran’ny fahasalamana sy ny lehiben’ny fokontany ny fanatanterahana izany.
Tatiana A
French