Hamoraina ny adisisika ataon’ny fiarahamonim-pirenena eny anivon’ny fitondram-panjakana sy eny anivon’ ireo vondrom-bahoaka ary ireo manam-pahefana. Mba handraisana andraikitra amin’ ny fiarovana ny zon’olombelona, raha ny nambaran’ny Alternatives Madagascar. Nikarakara fiofanana mikasika ny “Advocacy Leadership Institute” (ALI), tetsy Antaninarenina, izy ireo. Niarahana tamin’ireo fiarahamonim-pirenena misehatra ao anatin’ny fiarovana ny zon’olombelona. Naharitra efatra andro ny fiofanana ary nifarana ,omaly. Tanjona ny hampitomboana ny fahaiza-manaon’ireo fiarahamonim-pirenena eto amin’ny Nosy sy hanamorana ny adisisika. Mba hitandroana ny fandriampahalemana, ny filaminana ary ny fiheverana ny zon’olombelona tsirairay.
Betsaka ny trangam-piarahamonina miharo herisetra miseho eny anivon’ny fiarahamonina. Toy ny fanolanana mahazo ny ankizy, ny herisetra mahazo ny vehivavy… “Tsy mahafantatra ny tsy fanajana ny zon’ny olombelona ny ankamaroan’ny olom-pirenena tsirairay noho ny tsy fahampian’ny vaovao mikasika izany”, hoy ny tale mpanatanteraky ny Alternative Madagascar, Mathieu Narendra. Nilaza izy fa tsy mora ny manao adisisika eny anivon’ny fanjakana amin’ny fanaovana tatitra mikasika izany. Nohamafisiny fa tokony hampahafantarina ny dingana tokony harahin’izy ireo eny amin’ireny biraom-panjakana samihafa ireny.
Hiasa manerana ny faritra 5 eto amin’ny Nosy izy ireo: Boeny, Atsinanana, Atsimo Andrefana, Menabe ary Analamanga. Tsiahivina fa noresahina nandritra izany, ny fanaraha-maso sy fiarovana ny zon’olombelona eo amin’ny rafitra iraisam-pirenena, isam-paritra ary nasionaly. Teo koa ny fomba atao ho fampandraisana anjara ny tsirairay amin’ny fanadinana ara-potoana maneran-tany sy ny drafitry ny tatitra ataon’ny fiarahamonim-pirenena. Ankoatra izay, ny fanatsarana ny rafitra fiaraha-miasa eo amin’ izy ireo sy ny andrimpanjakana manao ny lalàna sy politika mikasika ny zon’olombelona.
Mino (mpianatra asa)
French