Eo am-panavaozana ny fandaharam-panabeazana ny minisiteran’ny Fanabeazam-pirenena amin’izao fotoana izao.
Rehefa hirosoana ny fanatsarana, hisy koa ny fanavaozana ny boky enti-mampianatra hahazoana ny kalitao kendrena. Notombanana ny boky fampianarana 56 efa nampiasaina ampolo taona maro teny amin’ny EPP sy ny CEG teto amintsika. Boky ho an’ny taranja Kajy sy Frantsay ho an’ny EPP ary ny boky Mathématique, Science de la vie et de la terre sy ny Science physique ho an’ny CEG, araka ny fanazavan’ny tale misahana ny famokarana fandaharam-pibeazana sy ny tahirin-kevitra mifandraika amin’izany sy ny fikarohana ara-pedagojika, Rakotovololona Helikanto, omaly, teny Antanimena.
Taranja fototra amin’ny fandaharam-pibeazana ireo sady efa hanaovana fanavaozana rahateo ka tsy maintsy jerena ny boky enti-mampianatra.
Natolotra, omaly, ny vokatry ny fanombanana natao teto Madagasikara, handrafetana tondrozotra vaovao hanavaozana ny boky enti-mampianatra. Nandray anjara tamin’ny fanombanana ny manampahaizana manokana amin’ireo taranja efatra voakasika sy ny teknisianina avy amin’ny minisiteran’ny Fanabeazam-pirenena. Tetikasa notanterahina amin’ny firenena enina aty Afrika ny fanombanana ka anisany i Madagasikara. Manohana ny tetikasa ny Confenem sy ny Unesco ary ny AFD.
Tsy ampy ny boky enti-mampianatra
Nambaran’ny mpampianatra sady mpampiofana amin’ ny taranja Frantsay, Randrianomanana Jaona, fa tsy ampy ny fitaovana toy ny boky enti-mampianatra sady efa antitra ka mila fanavaozana. Tokony hifanaraka amin’ny zava-misy iainan’ny mpianatra eto amintsika koa ny votoatiny hanamora ny fampitana any an-dakilasy. Mila misokatra amin’ ny lalana hafa rehetra hampitana fahalalana koa ny isan-tsokajiny ka tsy ho sahirana rehefa misy olana toy ny fihibohana nandritra ny fiparitahan’ny valanaretina Covid-19.
Vonjy
French