Notendren’ny papa Fransoa, tamin’ny 19 mey lasa teo, ho eveka mpanampy ao amin’ny diosezin’i Morondava ny pretra Rakotojaona Jean-Nicolas, izay pretra diosezianina avy amin’ny diosezin’ Antananarivo. “Misaotra an’ Andriamanitra ny Fivondronamben’ny eveka eto Madagasikara amin’ny nanendreny sy nanomezany mpiandry ondry vaovao, ny Mgr Rakotojaona Jean-Nicolas, izay ho eveka mpanampy ao amin’ny diosezin’i Morondava”, hoy ny filohan’ny Fivondronamben’ny eveka eto Madagasikara sady eveken’i Morondava, ny Mgr Ralamboniaina Marie Fabien, ny amin’izany.
“Isaorantsika ny papa Fransoa sy ny Nonce apostolique ny Mgr Tomasz Grysa nanampy antsika nahita ity mpiandry ondry vaovao ity”, hoy izy. Raha sitrapon’Andriamanitra, amin’ny alahady 2 jolay amin’ny 7 ora sy sasany, no hanamasinany azy ao amin’ny kianjan’ny kolejy Md Paoly. Miantso ny rehetra ho amin’izany izy, ary manasa ny vahoakan’i Menabe hivavaka ho an’ny eveka vaovao. Teny fanevany ny hoe : “Jesoa, matoky Anao aho”.
R. Nd.
French