Nisokatra omaly ary hitohy hatramin’ny rahampitso ny “Andro iraisam-pirenena ho an’ ny faritra – Jir” any amin’ny faritra Atsimo Atsinanana. Niatrika izany ny Praiminisitra sady lehiben’ny governemanta ifarimbonana, i Ntsay Christian. Nambarany tamin’izany fa laharam-pahamehana ny fametrahana ny fitsinjaram-pahefana tena izy ahafahana mitondra ny fampandrosoana eny ifotony. “Porofon’ izany ny hetsika tahaka izao”, hoy izy. Tanjona ny hampahafantatra ny otrikarena eo anivon’ny faritra iray, amin’ny alalan’ny fanatanterahana ny hetsika. Hisarihana ireo mpampiasa vola avy eto an-toerana sy avy any ivelany. Mitana ny laharana voalohany amin’ny otrikaren’ny any an-toerana ny harena an-dranomasina. Maro ireo mivelona amin’izany. Eo koa ny voly fanondrana toy ny poavra, ny jirofo, ny lavanila ary ny fanodinana menaka manitra. Ireo vokatra azo ahodina eo an-toerana toy ny voanjo. Ny asa tanana ka misehatra amin’izany ireo vehivavy. Fanamby amin’ny fanatanterahana ny “Jir” ny ahafahana manodina ny otrikarena eo an-toerana sy ny fitadiavana lalam-barotra.
Nambaran’ny tale misahana ny toekarena eo anivon’ny minisiteran’ny Raharaham-bahiny, Rasata Rafaravavitafika, fa efa nametraka sy nitondra zavatra samihafa ho amin’ny fampandrosoana ny faritra efa nandray ny hetsika “Jir”.
Synèse R.
French