Nifarana tany Fianarantsoa ny herinandro teo ny zaikabe faha-45 ho an’ny komity foiben’ny FFKM. Anisan’ny tafiditra tao anatin’ny fehinkevitra ny momba ny hanohizan’ny fiangonana ny fanelanelanana ny raharaham-pirenena.
Anisan’izany ny hafatra fiantsoana ireo mpahay lalàna zanaky ny FFKM. “Ilaina izy ireo hanazava ireo teboka maromaro tsy itovian-kevitra manoloana ny resaka fifidianana”, hoy ny fanambarana. Eo koa ny antso avo ho an’ny Andrimaso FFKM hanohy ny fanabezana olom-pirenena sy ny hanokanana vavaka isanandro ho an’ny vahoaka malagasy sy ny firenena. Na izany aza, tsy tafiditra tao anatin’ny hafatra ny fomba hanohizan’izy ireo ny fandaminana ny raharaham-pirenena. “Hanohy ny fampihavanana araka ny tarigetra iorenan’ny fiangonana ny FFKM”, hoy hatrany ny fanambarana.
Hotantanin’ny FLM indray ny FFKM
Momba ny raharaha anatiny kosa, hitohy ny fanomezan-danja ny fampiraisana ireo fiangonana efa-tonta eo anivon’ny FFKM ka miainga sy mifototra amin’ny fanamafisana ny firaisam-pinoana Eokiomenisma izany.
Etsy andaniny, nankasitrahana tamin’izao zaikabe, nandritra ny roa andro izao, ny filohan’ny FJKM, ny mpitandrina Andriamazosoa Irako Ammi, tamin’ny fitantanany ny FFKM tamin’ity taona ity. Handray ny fitantanana kosa manomboka amin’ny taona ho avy, ny filohan’ny FLM (Loteranina), ny pasitora, Rakotozafy Denis.
Synèse R.
French