Vaovao lehibe ho an’ny taranja Jiu-Jitsu Breziliana! Hoavy eto Madagasikara, ny volana mey izao, i Royce Gracie. Tsisy tsy mahafantatra azy eo amin’ny tontolon’ny JJB maneran-tany. Zanak’i Hélio Gracie, ilay olobe malaza namorina ny taranja Jiu-jitsu Brésilien, i Royce Gracie. Tany amin’ny taona 1990 tany no tena nampalaza azy ary efa tompondaka maneran-tany, tsy latsaky ny impolo. Azo lazaina, araka izany, fa zava-dehibe ho an’ny Jiujitsu malagasy ny fahatongavan’i Royce Gracie eto Madagasikara. Firenena maro no niandrandra ny hizarany traikefa fa ny firenena malagasy no nitsikian’ny vintana. Ny Telezoro Évents, mpikarakara hetsika ara-panatanjahantena sy ny federasiona malagasin’ny Jiu-jitsu Breziliana no angady nananana sy vy nahitana izao fampiofanana hatolotr’i Royce Gracie eto an-toerana izao. Tsiahivina fa Razafimbola Arianala sy Radafy Ranaivo, izay samy tepana mainty mipetraka any Canada, no nanorina ny Telozoro Events. Araka ny fandaharam-potoana, ny 25 mey hariva no higadona eto Madagasikara i Royce Gracie. Hanomboka ny 26 mey kosa ny fampiofanana arahina “festival” izay tarihiny. Ny 19 mey no hoavy eto an-tanindrazana ny Telozoro Events. Nohamafisin’ny teo anivon’ny federasiona malagasin’ny Jiu-jitsu Breziliana fa tsy mbola nisy teto Madagasikara sy teo amin’ny taranja rehetra misy, ny fahatongavana olo-malaza sy manana ny maha izy azy toy izao. Tsy ny taranja JJb ihany no hahazo tombony fa eo koa ireo haiady isan-karazany, toy ny MMA (Martial Mixed Arts). Efa tompondaka tamin’ny taranja MMA ihany koa mantsy, i Royce Gracie.
Mi.Raz
French