Gaboraraka ! Izay no azo ilazana ny fifamoivoizana ao an-drenivohitry ny faritra Atsinanana. Karazam-pitaterana maro no hita ao an-toerana, toy ny moto, bisikileta, Bajaj, posy raha tsirairay kosa ireo taxi miasa amin’ny alina. Samy manana ny fitsipika mifehy azy anefa ireo fa ho an’ny moto kosa, tsy maintsy ampiasana aroloha ho an’ny mpitondra sy ny olona entina. Eo koa ny taratasy tokony hazava tsara satria ity karazam-pitaterana iray ity no anisan’ny fitaovana mora hampiasain’ny jiolahy raha hanao fanafihana izy ireo. Mora handosirana, mitsofotsofoka ny moto rehefa avy manatanteraka ny asa ratsiny ry zalahy. Vokany, raha ny fanadihadiana natao teny anivon’ny kaomisaria foibe, sampana misahana ny lozam-pifamoivoizana (Brigade des accidents de la circulation) tarihin’ny Inspektera Randriantsara Emile, tafakatra ambony ny gaboraraka sy ny tsy fanarahan-dalàna ataon’ny mpampiasa moto ao Toamasina. Maro amin’ireo ray aman-dreny mitondra ny zanany amin’ny moto no tsy manao aroloha sady manao taingin-telo. Raha ny zava-misy omaly, teo amin’ny sampanana Morafeno. Nisy ny fanentanana sy ny fampianarana nataon’ny polisy herintaona lasa izay amin’ny tokony hampiasan’ny olona tsirairay mitondra moto aroloha. Tokony hisy fiantohana sy taratasy mazava koa ny moto. « Tapitra izay ny goragora ka hampihatra ny lalàna ny polisy. Hiroso amin’ny fanasaziana izahay. Tsy vitan’izay fa hosavaina hatramin’ny fitoeran’entan’ny moto mba hisorohana amin’ny fitondran’ireo jiolahy fitaovam-piadiana mivezivezy », hoy hatrany ny Inspektera Randriantsara.
Sajo/J.C
French