Nanomboka ny taona 1982, nambara fa Andro maneran-tany ho an’ny toerana miavaka sy zava-naorina ny 18 avrily. Io no tapaky ny komity iraisam-pirenena misahana ny toerana miavaka sy ny zava-naorina, na ny Icomos. Anisan’ireo manamarika izany i Madagasikara, amin’ny alalan’ny minisiteran’ny Kolontsaina sy ny serasera, izay miara-miasa akaiky amin’ny komity nasionaly malagasy ho an’ny Icomos.
« Toerana miavaka sy zava-naorina : vonona hiatrika ny loza manambana », ny lohahevitra nosafidiana ho an’ny fankalazana amin’ity taona ity. Hisy ny fitsidihana ny Rovan’Antongona, izay iray amin’ireo toerana miavaka sy zava-naorina, ny 19 avrily izao. Hotontosaina amin’io ny fizarana ny bokikely torolalana amin’ny fanentanana. Toerana manan-tantara, mahafeno ny fepetra maha toerana miavaka sy zava-naorina.
Hisy horonantsary handeha amin’ny TVM, izay mahakasika ireo toerana miavaka sy zava-naorina miatrika ireo loza voajanahary. Hampahafantarana ao amin’ny pejin’ny minisitera sy ireo haino aman-jerim-panjakana ireo harembakoka, ny 19 hatramin’ny 26 avrily. Hotontosaina ny 26 avrily kosa ny “Tafasiry”, eny amin’ny Lapan’Andafiavaratra, manodidina io lohahevitra io ihany. Entanina ireo matihanina rehetra manodidina ny harembakoka mba handray anjara amin’ny atrikasa.
Zo ny Aina
French