SOMBIM-BAOVAO

Hotanterahina anio ny andro fahatelon’ny fiadiana ny ho tompondakan’i Madagasikara, N1A basikety, faritra afovoany, izay hatao any Antsirabe. Hisy lalao efatra handeha eny an-toerana. Anisan’ny fihaonana andrasan’ny rehetra ny fifanandrinan’ny GNBC Analamanga sy ny MBC Atsinanana.
Lavon’ny Asco Atsimo Andrefana tamin’ny isa 38 no ho 29 ny THBC, afakomaly, nandritra ny fiadiana ny ho tompondakan’i Madagasikara, taranja handball 2023. Tsiahivina fa ny Asco no tompon’ny amboara farany ny taona 2022. Tsara marihina fa izay voahosotra ho tompondaka amin’ity no manao CCOI, izay hatao eto Antananarivo.
Ny Zanakala FC, nandresy ny Disciples FC Vakinankaratra, tamin’ny isa 3 no ho 2, ny alahady lasa teo, tany Fianarantsoa, nandritra ny manasa-dalana mandroson’ny fiadiana ny ho tompondakan’i Madaga­sikara, “Coca Cola Pureplay Football League”. Raha tsy misy ny fiovana dia hatao ny 23 jona ho avy izao ny fiverenana.
Hotontosaina ny zoma ho avy izao ny lanonam-panokafana ny fiadiana ny ho tompondakan’i Amerika, “Copa America 2024”, izay hatao any Etazonia. Hanokatra ny lalao amin’izany ny fifanandrinan’i Argentine, tompondaka farany sy i Canada. Araka ny fikarohana natao, hanomboka amin’ny 3 ora maraina aty Madagasikara io lalao io.