Lasan’ny jiolahy mitam-piadiana ny vola nitentina 11 tapitrisa Ar tao amin’ny tokantrano iray ao Ambatomitsangana, kaominina Ambohitrambo, distrikan’Arivonimamo, afakomaly alina. Niditra an-keriny tao amin’io trano io ireo mpandroba tamin’ny 10 ora alina. Nihanika teo amin’ny lavarangan’ny trano ny roa lahy. Nosimbainy ny hidim-baravarana ka tafiditra tao ambony rihana izy ireo. Niandry sy nihainohaino teo ivelan’ny trano ny namany. Nanambana ny tompon-trano tamin’ny basy teny aminy ireo jiolahy. Nidaroka ny lasibatra avy hatrany izy ireo. Noterena hanome ny vola rehetra io tompon-trano io. Tsy afa-nanda sy natahotra ny ainy, nanome ny vola nampiriminy tao amin’io ity farany. Nentin’ny olon-dratsy nandositra ny vola an-tapitrisany. Nanapoaka basy izy ireo sady nandositra niala ny tanàna. Tsy nisy nahasahy nivoaka ny manodidina nahare ireo jiolahy. Anatin’ny fanadihadiana sy ny fikarohana ireo nahavanon-doza ny mpitandro filaminana amin’izao fotoana.
Tsiferana R.
French