Mafy ny fiainana! Hita faty nihantona tamin’ny tady, nikirozaroza teo ambony hazo ny renim-pianakaviana iray. Ankoatra ny fikorotanan-tsaina, misy ny mamono tena.
Hatairana ny an’ny mponina manodidina tao amin’ny fokontany Ambohimitsinjo, kaominina Bevonotra, distrikan’i Sambava, omaly tamin’ny 7 ora maraina. Ramatoa iray, 50 taona, monina ao anatin’ny tanànan’i Bevoay no hita faty. Nifatotra tady niloko manga teo amin’ny tendany, nihantona tamin’ny hazo izy. Araka ny fahitan’ireo nanatri-maso, tombanan’izy ireo ho namono tena izy. Tsy nahitana ratra ny faritry ny vatany. Hazom-boasary manana haavo 3 metatra eo ho eo io nihantonany io. Voamarin’ny mpitsabo nanao fitiliana fa namono tena izy.
Adim-piainana
Araka ny valim-panadihadiana nataon’ny zandarimaria miasa ao an-toerana, tsy fahazakana adim-piainana no nitarika ilay renim-pianakaviana hanao izao famonoan-tena izao. «Ankoatra ny fahasahiranany amin’ny fiainana andavanandro, tsy mifankahazo loatra amin’ny havany izy. Tsy fahazakana ny hamafin’ny fiainana mihitsy no nitarika azy hamono tena», hoy ny fanamafisan’ny lehiben’ny Tobim-paritra ao Amboangibe. Natolotra ny fianakaviany, taorian’ny fitilian’ny tomponandraikitra, ny vatana mangatsiakan’io ramatoa io.
Tsiferana R.
French