Vokatry ny fandalovan’ny rivodoza Dikeledi tany amin’ny faritra avaratra, mahatratra 8 962 ny mpianatra tsy afaka manaraka ny fampianarana noho ny antony samihafa, araka ny tatitra navoakan’ny BNGRC. Any amin’ny faritra Diana no be indrindra, miisa 6 436, any Sava: 1 913 ary 613 ny any Analanjirofo. Antony, ny faharavan’ny efitrano fianarana 80 ka ny 58 amin’ireo ao amin’ny faritra Diana. Telo ny sekoly dibo-drano tanteraka ao Diana. 116 ny efitrano fianarana tsy azo ampiasaina fa simba amin’ny ampahany na tsy misy tafo intsony fa lasan’ny tafiotra. Nifandimby mianatra amin’ny efitrano tsy simba ireo mpianatra ao amin’ny Cisco Antsiranana I sy II ary Ambilobe, nanomboka ny fiandohan’ny herinandro teo. Tanjona amin’izany ny tsy hahatapaka maharitra ny fanabeazana. Ho an’ireo toerana mbola dibo-drano, miankina amin’ny fihenan’ny haavon’ny rano ny fiverenan’ny asa fampianarana, amin’ny Cisco Fenoarivo Atsinanana sy Maroantsetra.
Tao Ambilobe, fianakaviana 64 nahazo vatsy avy amin’ny tomponandraikitry ny BNGRC. Vary, menaka ary voamaina no nozaraina. 5 803 ny isan’ny traboina voamarina hatramin’ny omaly, avy amin’ny tokantrano 801 avy amin’ny faritra Analanjirofo, Diana ary Sofia.
352 kosa ireo nafindra toerana avy amin’ny tokantrano 83, ka 239 ao Vohemar, 12 ao Ambilobe, enina ao Nosy Be ary 95 ao Sambava, amin’ny toeram-pandraisana enina.
Vonjy
French