Asa ny maha mpanakanto manao mozika. Eny, misy ny manao izany ho fialamboly fotsiny, fa efa miroso amin’ny rafitra matihanina kosa ireo mpanao mozika miezaka sy efa mivelona amin’izany. Asa voasokajy ho anisan’ny varotra, satria miankina amin’ny fifandanjan’ny tolotra sy ny tinady izany. Toy ny asa ara-barotra rehetra, miankina amin’ny vola miady ihany koa. Mitaky masontsivana maro, araka izany, ny fanaovana mozika matihanina, izay matetika tsy fantatra na hadinodinon’ireo mpanakanto izay. Any amin’ny famoronana ny tonony sy ny feony dia efa tokony hipetraka ny safidy: hira hatao inona? Ho an’iza? Inona ny tanjona? Sns. Raha toa ka hozaraina amin’ny besinimaro, mba ho be mpankafy, hitarika any amin’ny laza ary ho lasa loharanom-bola ho an’ny mpamorona sy/na ny mpihira, dia misy dingana maromaro tokony harahina hahatongavana amin’izay. Ny tsy fahalalana na fandinganana izany no mahatonga ireo mpanakanto tsy malaza, na tsy mahatana ela ny lazany.
Misy rafitra tokony
hohajaina
Eo ny miditra ny rafitra matihanina, izay tokony hohajaina ho an’ny mpanakanto na tarika te hihodina ela ao anatin’ny tsenan’ny mozika eto Madagasikara. Ny mpanakanto mpamorona, mpihira ary mpitendry manao mozika. Olon-kafa kosa no mikarakara ny tarika (manager). Io no mandamina ny asa amin’ny ankapobeny, mitady ny tsena, manao ny fifanarahana arakasa rehetra, manaparitaka ny hira amin’ny haino aman-jery, mandamina ny fandaharam-potoan’ny fampisehoana, sns. Hafa kosa ny andraikitry ny trano mpamokatra, izay mandray an-tanana ny tarika, manomboka any amin’ny fandraisam-peo sy sary ny hira, hatrany amin’ny fampisehoana izay mety hiitatra ho fitetezam-paritra. Fifanarahana mazava no mamaritra izany, ary tsy voatery hitohy fa arakaraka ny fandehan’ny tsena.
Nahoana no malaza kokoa ny avy any Avaratra?
Adihevitra iray nosokafan-dRazafiarison Francis na i Francis Turbo izy ity. “Nahoana no anjakan’ny mpanakanto avy any avaratra kokoa ny tsenan’ny mozika eto Madagasikara?”. Voalohany indrindra, nofaritany mazava fa ny faritra Sava, Diana, Boeny, Sofia, Betsiboka, Analanjirofo ary Atsinanana, izany hoe, faritany Antsiranana, Mahajanga ary Toamasina io natambatra anatin’ny hoe “avaratra” io. Ireo mpanakanto malaza amin’izao fotoana izao, izany hoe, tao anatin’ny 5 taona dia saika avy amin’ireo faritra ireo avokoa. Santionany fotsiny ireto: Shyn sy Denise ary ireo ao anatin’ny label Makua Entertainement. Ny ankamaroan’ireo anatin’ny Davalt Rwikordz, Wawa, Dadi love, Big Mj, Basta Lion, LJo, Rim Kah, Sisca, Smaven, Moopcan, Dalvis, Jazz MMC, Elidiot, Mad Max, Rootsman, sns. Mbola nanaporofo izany fironana izany ny “RDJ Mozika”, nizarana fankasitrahana ho an’ny mozikan’izy ireo. Misy ihany ireo avy any atsimo ao anatin’ny tsena toa an-dry Lico Kininike, Ceasar, Balck Nadia, Oladad, Raouto, Khelene, Sanih, sns. Manampy ireo avy aty afovoan-tany, toa an-dry AmbondronA, Samoëla, Mage 4, Reko Band, Bolo, Mr Sayda, Wada & Youngs, Njara Marcel, sns. Tsy marina manontolo akory fa vokatry ny fanadihadiana fotsiny ity lisitra ity…
Fa ireo no malaza, satria mamaly ny filan’ny tinady ny tolotra. Izay ihany ny fanazavana. Mitambatra ao avokoa na ny tononkira, ny gadona, sns. Tsy any amin’ilay hoe ratsy na tsara na hoe hafa ihany ny taloha ny adihevitra, fa eo amin’izay malaza ka mahazo vola amin’ny mozika amin’izao fotoana izao. Nampiasa vola, nampiasa satratejia ara-barotra dia mahazo tamberim-bola izy ireo. Fa ny zava-dehibe ankoatra izay, manjifa ny vokatr’ireto mpanakanto ireto ny mpankafy azy!
Hafa kosa ny tsena iraisam-pirenena
Mbola manamafy ny voalaza etsy ambony, ny salegy sy ny manodidina azy aloha no tena malaza manerana an’i Madagasikara, hatrany ivelany. Hafa kosa anefa ny fikatsahana ny tsenan’ny mozika iraisam-pirenena. Saika ireo mpanakanto nisafidy ny mozika nentim-paharazana, nasiam-panatsarana kosa no manjaka amin’izany. Maro amin’izy ireny kosa no mpanakanto avy any atsimo, raha arahana amin’ilay fitsinjarana voalaza etsy ambony.
Ny lakileny? Ilay rafitra matihanina ihany, fa miampy ny fahaiza-mikaroka ny tsena iraisam-pirenena sy ny fivelaran’ny fifaneraserana. Saika tsena ho an’ny firenena mampiasa ny teny frantsay no misokatra sy akaiky kokoa ny Malagasy mpanakanto. Matetika ireo, “festivals” any Afrika sy Frantsa. Ny tsena amin’ny firenena mampiasa ny teny anglisy kosa anefa no misandrahaka bebe kokoa, sy hahazoana vola tsara kokoa. Tafiditra anisan’ny tsena ivelany ihany, saingy tsy dia tena tanjona ho an’ny Malagasy mpanakanto ny andiam-pampisehoana ho an’ireo mpiray tanindrazana monina any ivelany, na “diaspora”.
Nangonin’i Zo ny Aina
French