Noraisin’ny ben’ny Tanànan’Antananarivo, Ramanantsoa Harilala, tetsy amin’ny Lapan’ny Tanàna Analakely, omaly, ny iraka manokana avy amin’ny Banky iraisam-pirenena, Catalina Marulanda. Anisan’ny iandraiketany ny sampandraharaha momba ny fampandrosoana an-tanàn-dehibe, ny fananan-tany ho an’ny faritra Afrika Atsinanana sy atsimon’i Afrika.
Nifantohan’ny fifanakalozan-kevitra eo amin’ny andaniny sy ankilany ny momba ny fandaharanasa Produir, fampandrosoana ny tanàn-dehibe. “Efa eo amin’ny dingana famaranana izany amin’izao fotoana izao ary nahazoana vokatra maro. Nisitraka tombontsoa manokana tamin’izany ny mponina sy ny renivohitra, Antananarivo”, hoy ny ben’ny Tanàna, Ramanantsoa Harilala. Natsidiny sy nangatahiny ary maniry ny tenany ny hanohizana izany fiaraha-miasa amin’ny Banky iraisam-pirenena izany, indrindra amin’ny fandaharanasa isitrahan’ny mponina sy ny tanànan’Antananarivo tombontsoa, araka ny nambarany hatrany.
Tsiahivina fa efa avy nihaona tamin’ny minisitry ny Fitsinjaram-pahefana sy ny fanajariana ny tany (MFFT), Andriantsitohaina Naina, ireto delegasionin’ny Banky iraisam-pirenena ireto. Voaresaka tamin’izany ny fanohanana ny fitantanana ny fananan-tany an-tanàn-dehibe sy ny fitantanana ny loza voajanahary. Hiroso amin’ny fankatoavana ny fanohanana ireo tanàn-dehibe sokajy faharoa koa ny eo anivon’ny Banky iraisam-pirenena ka iarahana miasa amin’ireo minisitera samihafa sy ny eny amin’ny vondrom-paritra itsinjaram-pahefana izany.
Synèse R.
French