Amin’ny ankapobeny, manomboka miverina indray ny fitsaram-bahoaka any Toamasina, amin’izao fotoana izao. Kivy amin’ny trangan-javatra ataon’ny fitsarana ny vahoaka satria votsotra avokoa ny ankamaroan’ny olon-dratsy rehefa avy notsaraina. Misy ihany koa ireo tafavoaka ny fonja fa tsy mipetraka ela any, raha ny zava-misy. Miverina mandrahona ny mponina sy ny mpitory ary ireo olona hanaovana ratsy sy ny rafi-piarahamonina izy ireny. Jiolahy roa avy nagalatra no niharan’ny fitsaram-bahoaka tany an-toerana, tamin’ny alahady lasa teo. Nentina notsaboina teny anivon’ny hopitaly ny iray, ary velona soa aman-tsara. Nalefan’ny hopitaly ary miverina mirihariha eny anivon’ny fiarahamonina indray.
Tsiahivina fa maty voatifitry ny polisy avy amin’ny UIR ny alahady 23 febroary vao mangirandratsy, ny jiolahy roa. Tratra teo am-panendahana olona hody avy namonjy lanonana ireo olon-dratsy miisa efatra. Nahazo antso avy amin’ny olon-tsotra ny mpitandro filaminana, ka tonga ara-potoana nijery ny zava-misy. Nitsoaka avy hatrany izy ireo vantany vao nahita ireo polisy. Raikitra ny fifanenjehana sy fifanjevoana taorian’izay. Niezaka nampijanona ireo jiolahy ny polisy fa nandositra hatrany izy ireo. Nitari-dositra nankany Ambalakisoa izy ireo. Tafatsoaka kosa ireo roa lahy ambiny, rehefa tafiditra teo amin’ny lalana mampisaraka an’Ambalakisoa sy Tanambao Verrerie. Marihina fa jiolahy anisan’ny nampihorohoro ny mponina amin’ny fokontany maro any Ambalakisoa sy Morarano izy ireo, raha ny fanazavana voaray.
Sajo
French