Tsy afa-bela i Toliara. Handravarava any amin’ny tapany atsimon’ny Nosy indray ilay rivodoza Jude. Tsy mbola tafarina akory ny fahavoazana teo aloha dia efa izao manafika izao indray ny manaraka.
Tapaka tanteraka ny famatsian-jiro sy ny lalam-pirenena faha-7 iny raha ny tatitry ny prefektoran’i Toliara vokatry ny rivotra sy orana entin’ilay rivodoza Jude.
Efa mafy ny fiantraikany na dia mbola filazana miloko mavo aza no voaray, omaly. Andrin-jiro miisa fito no nidaraboka eny an’arabe vokatry ny rivotra mifofofofo ka miteraka fahatapahan-jiro eo an-tampon-tanànan’i Sakaraha, araka ny tatitra.
Miato ihany koa ny fampiasana ny lalam-pirenena faha-7 noho ny fianjeran’ny hazobe mibahan-dalana hivoaka ny tanànan’i Sakaraha raha hihazo an’Antananarivo.
Namoaka fanambarana ny prefektoran’i Toliara fa miato avokoa ny fampianarana rehetra ao amin’ny faritra Atsimo Andrefana nanomboka omaly, hitohy anio.
Tsy miasa avokoa ny mpiasam-panjakana sy ny tsy miankina ialana amin’ny loza. Tsy voakasik’izany kosa ireo sampandraharaha vonjy taitra izay tokony hisy mpiandry raharaha hatrany.
Voarara ny fivoahana an-dranomasina, na mpanjono na mpitatitra, satria heverina hitera-doza ny onja mafy ateraky ny rivotra manomboka eo Morombe hatrany Androka Ampanihy. Miato ny fitateram-bahoaka amin’ny lalam-pirenena faha-9, faha-7 ary faha-10 ho an’ny zotra rehetra, na nasionaly na rezionaly, miainga ao Toliara.
Hamafisina ny fahamailoana ho an’ireo mipetraka amin’ny toerana iva manamorona ny reniranon’i Fiherena, Mangoky, Onilahy, Linta amin’ny mety ho fiakaran’ny rano.
Hiditra an-tanety ilay rivodoza Jude
Omaly tolakandro, tany amin’ny 230 km andrefan’i Toliara no nisy ny foiben’ilay rivodoza Jude. Matanjaka ity rivodoza ity satria manodidina ny 90 km/ora ny rivotra entiny miaraka amin’ny tafiotra 125 km/ora manakaiky ny foibeny. Mikisaka mianatsimo atsinanana izy amin’ny hafainganam-pandeha 14 km/ora.
Vinavinaina hiditra an-tanety ny alina teo izy eo anelanelan’i Toliara sy Androka/Ampanihy.
Ahina tanteraka ny rotsakorana betsaka any amin’ny tapany atsimon’ny Nosy.
Tatiana A
French