« Hitohy ny fampiofanana ny fikambanam-behivavy ao amin’ny kaominina Anosy Avaratra », hoy ny filohan’ny VVMAA, sady talen’ny Centre d’information et de documentation scientifique et téchnique eo Tsimbazaza. Manana ny diplaoma Doctorat en sciences sociales izy ary nampivondrona ny fikambanam-behivavy amin’ny fokontany dimy.
Navondron’ny dokotera Rakotondralala Cindy Vermeille ho federasionina iray, Vondron’ny vehivavy maherin’Anosy Avaratra (VVMAA), ny fikambanana 14 efa nisy tao amin’ny kaominina Anosy Avaratra, distrikan’Antananarivo Avaradrano, ny taona 2024. Fikambanam-behivavy tantsaha, mpiompy, mpampianatra, mpanasa lamba, mpandraharaha… Satria tsapany fa motera mampihodina ny fiainan-tokantrano ny vehivavy. Miainga amin’ny isan-tokantrano rahateo ny fampandrosoana ary mipaka amin’ny fokontany mifarana amin’ny firenena iray manontolo. Tanjon’ny vondrom-pikambanana ny hampahaleo tena ny vehivavy amin’ny fitantanana ny tokantrano. Asa voalohany hahatongavana amin’izany ny fampiofanana ka nisantarana azy ny vehivavy mpiompy sy mpamboly. « Teo koa ny fampiofanana momba ny zaitra ka tsy handray olona avy aty an-dRenivohitra intsony ny orinasa afakaba ao an-toerana fa ireo tanora, vehivavy voaofana no hamaly ny tolotrasa misy », hoy ny filohan’ny Vondrom-pikambanana VVMAA.
Teknisianina avy ao amin’ny minisiteran’ny Fambolena sy ny fiompiana no nanofana ny vehivavy tantsaha momba ny fambolena manaraka ny fiovaovan’ny toetr’andro sy ny fiompiana. Taorian’ny fiofanana, nomena tosika zezika sy masomboly ny mpamboly ary zana-kisoa sy zanak’akoho ireo mpiompa hampiharana ny fiofanana.
Naranty ny vokatry ny fiofanana
Nanampy ny lohahevitra niofana ny fandrindrana ny fiterahana ka tokony izay sahaza ny vola miditra ny ankizy ateraka. Ho fanamarihana ny Andro maneran-tany momba ny zon’ny vehivavy farany teo, naranty tao Anosy Avaratra ny vokatry ny fampiofanana sady namidy hampihodinana ny fikambanam-behivavy mpikambana. 2 300 ireo vehivavy nandray anjara tamin’ny hetsika. Nisy koa ny fizahana ny fahasalamana sy fanomezana tohana ireo vehivavy 70 taona no ho miakatra satria loharano nipoirana.
Vonjy
French