Tsy mbola misy ny daty ofisialy mampiseho ny fiverenan’ny fifaninanana nasionaly, “World Cola PFL”, taranja baolina kitra. Raha ny fikarohana natao omaly, mitarika vonjimaika amin’ny mpampidi-baolina betsaka indrindra i Pascal, lohalaharan’ny As Avenir Ste Anne. Tsiahivina fa niatrika lalao efatra ny tenany tamin’ireo andro enina ny fifaninanana efa vita. Marihina fa sambany i Pascal sy ny ekipany vao niatrika ity fifanintsanana World Cola PFL ity. Ny lohalaharana tahaka itony moa no azo heverina hanana ny hoaviny sy hampisongadina ny ekipa nasionaly malagasy, ka tokony hojeren’ny federasionina akaiky. Ankoatra izay, mitarika eo amin’ny laharana efatra voalohan’ny fifaninanam-pirenena, ny As Fanalamanga, manana isa 13, ny CFFA Andoharanofotsy, isa 11, ny Fosa Juniors Boeny, isa 10 ary manaraka azy ao ny Ajesaia, isa 10, saingy manatombo amin’ny baolina tafiditra ny Fosa Jr. Ampahafatarina fa ny fifaninanana PFL, tokony hifarana ny volana jona, mba hahafantarana mialoha ny anaran’ny klioba izay hisolo tena an’i Madagasikara any amin’ny “Ligue des Champions CAF”. Ity lalao ity koa dia natao hitsirihana ireo Malagasy mpilalao izay handrafitra ny ekipam-pirenena Barea de Madagascar, any amin’ny « Chan 2024”, izay hatao ny volana aogositra ho avy io, any Kenya, Tanzanie, Oganda.
Fitia Randria
French