TARATRY ny KANTO

Nomarihina teny Anatirova ny “Taombaovao Mala­gasy fidiovana 2025”. Nisy ny fizarana ny “afo tsy maty” tao amin’ny Kianja Masoandro, ny asabotsy teo. Nitohy ny alahady izany, izay nanaovana ny fomba rehetra rehefa tonon-taona toa izao: tatao, tsodrano, sns. Nahitana vahiny maro nanatrika izany, ka inoana fa miroso mankany amin’ny fankatoavana ny fankalazana ny fitondram-panjakana.
Hampidirina ho harem-bakoka iraisam-pirenena ny lamba fitafy. Fanambarana nataon’ny minisitry ny Serasera sy ny kolontsaina, Mara VOlamiranty Donna, nandritra ny kaba­riny teny Anatirova io. Nohamafisiny nandritra izany koa ny fahatongavan’ny kabeson’ny Ampanjaka Toera sy ny an’ireo miaramilany, ny 14 avrily ho avy izao.
Mbola mitana ny lazany i Lôla. Fanamby goavana no tontosan’ity mpanakanto ity, ny alahady teo. Namaly ny antson’i Lôla ireo mpankafy azy hatrany, nameno an’Antsaha­ma­nitra. Nanamafy iny seho iny fa mbola ao anatin’ny laza ity mpanakanto ity. Anisan’ny niavaka indrindra tamin’ny seho ny nanasany ireo namany an-tsehatra, toa an’i Bodo, Dô Rajhonson ary i Njara Marcel.
Niverina amin’ny heriny ny tarika Green. Ani­san’ny tsapan’ireo mpankafy Rock, nandritra ilay seho “Revy rock mandrakizay”, ny alahady teo, tao amin’ny kianja Barea, izany. Mbola teo ry Poun sy i Jacquot, nampian’ireo tanora ao ana­tin’ny tarika. Namaly ny antso koa ny mpankafy ny tarika Tse­latra, na tsy teo aza i Eric noho ny tsy fahasalamany.