Adihevitra tena ilaina. Hotontosaina anio manomboka amin’ny 2 ora sy sasany tolakandro, etsy amin’ny Tranombokim-pirenena Anosy ny velakevitra arahina ady hevitra manodidina ny «Boky sy ny zon’ny mpanoratra: Ny olana sy ny fanamby». Hifanatrika mandritra io fotoana io Rarivojaona Joelinirina, talen’ny Ofisim-pirenena misahana ny zon’ny mpamorona na Omda, Razafintsalama Marie Michèle, mpitantana ny Edition Jeunes Malgache, izay solontenan’ny mpanonta sy mpamokatra boky ary i Hobiana Andrianimerina, solontenan’ny mpanoratra.
Misy sady maro tokoa ireo olana mila fakafakaina, sedrain’ny tontolon’ny boky, amin’izao fotoana izao. Maro ireo mpanoratra no tsy mahalala ny manodidina ny zony, amin’ny famoahana ny sanganasany. Toraka izany koa ireo mpisehatra hafa, manodina ny sehatry ny vakiboky, ka anisan’ny manana andraikitra goavana indrindra amin’izany ny mpanjifa boky.
Inona ny lalàna mandrindra izany? Inona ny dingana tokony hataon’ny mpanoratra, izay mpamorona? Inona ny anjara andraikitry ny mpanonta sy ny mpamokatra boky? Inona avy ireo tsara ho fantatry ny mpamaky boky? Samy fanontaniana manitikitika ny ao anatin’ny tontolon’ny boky ireo.
Afaka manatrika ny velakevitra avokoa iroe rehetra liana sy voakasika amin’izany. Entanina ihany koa ireo mpianatra, satria fanararaotra amin’ny fampitomboana fahalalana izy itony.
Zo ny Aina
French