Mahafinaritra izaitsizy ny tanàna amin’izao fotoana, hiandrasana ny fahatongavan’ny vahiny hanatrika ny fihaonamben’ny Vaomieran’ny ranomasimbe Indianina. Miara-mientana avokoa ny mpikambana amin’ny governemanta. Mandray kifafa hatramin’ny minisitra manadio tanàna. Na misy aza ny fitohanana amin’ny fifamoivoizana dia mba afaka ny fahasorenan’ny maso mijery ny loto sy ny fako.
Miverina ny Tagnamaro, fomba fiasa tokony hapetraka hoentina manabe ny sarambabem-bahoaka. Zava-dehibe ny fampandraisana anjara ny vahoaka amin’ny asa rehetra hoenti-manatsara ny tanàna. Ny tahaka itony no tokony hametrahana ilay fitohizan’ny raharaham-panjakana. Tsy hijerena loko politika fa tsaraina amin’ny akony.
Raha ny olana ara-bola lalovana eto tamin’ny firenena, ity no “raha bojy” tokony hatao fomba amam-panao. Hahazoana tombontsoa roa sosona io satria ny vola tsy mivoaka no mahazo fitaizana ho olom-pirenena vanona ny vahoaka sy ny mpiasam-panjakana. Tsy ilay kisary miandry toloram-potsiny mahazatra fa ilay olom-pirenena vanona.
Mila manana kolontsaina mifototra amin’ny tombontsoa iombonana ny rehetra fa tsy tiatiakely. Izay rahateo ny rangory fototry ny afo amin’ity fahantrana diso tafahoatra ity. Ilay mandeha irery, mikajikajy irery no manary. Mety mahazo tombony saingy mandalo fotsiny ihany ka tsy misy misintona miakatra intsony rehefa lavo.
Voakasik’izay fomba fiasa miray saina izay ny tokony hitondrana ilay fandraisana vahiny. Mba hialana ny fanatsatsoana sy ny famadihan-dresaka ho mbola voazanaka. Tsy afaka ny hiolonolona isika fa tsy maintsy mivelatra amin’ny any ivelany. Hitady fiaraha-miasa aza hatao ka mainka misy manatona! Tsy afaka ny hanosi-bohontanana isika. Hitarina amin’ny iraisam-pirenena ny Tagnamaro.
r.r
French