Mbola nanamafy ny kandidà sy ny delege miara-dia amin’ny Avi, avy any Andriamena Tsaratanàna, fa mitsipaka marindrano ny voka-pifidianana ben’ny Tanàna tany an-toerana. Naneho ny alahelony izy ireo tamin’ny fanafoanana ny voka-pifidianana tamin’ny biraom-pifidianana miisa 4 sy ny fahatratrarana hosoka. Efa lany tamin’ny voka-pifidianana navoakan’ny Ceni ny kandidàn’ny Avi, Rakotoarivony Minosoa. Nivadika anefa ny vokatra noho ny fitarainan’ny delegen’ny kandidà tsy miankina teny amin’ny tribonaly misahana ny ady amin’ny fanjakana rehefa foana ny vokatra tamin’ny birao efatra. Lany, araka izany, io avy amin’ny mahaleo tena io. Tsipahin’ireto solontenan’ny kandidà sy ny delege ireto anefa izany. “Tsy manara-dalàna io, satria, tokony tamin’ny andron’ny fifidianana no nanao fitarainana ireo delege, raha ny lalàna”, hoy izy ireo. Nanamafy izany koa ny kandidàn’ny Irmar. Niantso ny fitondram-panjakana izy ireo mba hijery akaiky izao zava-mitranga any Andriamena izao.
Mi.Raz
French