Fametrahana ny rohin’ny boky : Nizara ny olana sedrainy ireo mpisehatra

Miezaka mitady ny fanatsarana hatrany. Tsy kivy satria manomboka mahita taratra hazavana ireo mpisehatra amin’ny tontolon’ny boky. Hapetraka ho mafy kokoa ny rohin’ny boky, ary hitodram-bahaolana ireo olana rehetra sedraina.

Tsy mbola voavaha ireo olana sedrain’ny tontolon’ny boky. Na izany aza, efa miroso tsara kosa ny paikady hamahana azy ireny, tato anatin’ny taona vitsivitsy izay. Ho tohin’ny atrikasa fa­metrahana ny rohin’ny boky, nisy ny fihaonana teo amin’ny minisiteran’ny Kolontsaina sy ny serasera sy ireo mpisehatra ny alarobia teo, tetsy amin’ ny Tranombokimpire­ne­na Anosy. Nizara ireo olana sedrainy eo amin’ny tontolon’ny famokarana boky ireo mpisehatra, ary nanolotra soso-kevitra ihany koa enti-manatsara izany. Tetsy andaniny, nihaino, nandray, namaly ary nandroso soso-kevitra sahady ihany koa ny avy amin’ny minisitera, notarihin’ny sekretera jeneraly sy ny tale jeneralin’ny Tranombokimpirenana, izay rantsamangaika voakasika mivantana amin’izany.
Iray ny tanjona dia ny hipetrahan’ny rohin’ny boky amin’ny tokony ho izy, ka hampiroborobo ny sehatry ny vaky boky eto Madagasikara. Nifa­nandrify sy nifameno, araka izany, ireo soso-kevitra, izay efa voadinika nandritra ny atrikasa teo aloha ihany. Anisan’ ireny ny fijerena tsirairay ireo mandrafitra ny rohin’ny boky sy ny fametrahana mazava ny asa aman’andraikitry ny tsirairay. Miainga any amin’ny mpanoratra izany, mandalo ny mpanonta, ny mpanapariaka, ny mpivarotra ary mipaka any amin’ny mpamaky. Ireto farany izay tokony ho mpanjifa ihany koa, mba tsy hampandringa ny rohy. Voaresaka matetika ny fanamorana ny fifandraisana eo amin’ny mpisehatra, hisian’ny fifampitokisana satria mifampiankina ny asan’ny tsirairay anatin’ny rohy. Eo ihany koa ny fikarohana ny marimaritra iraisana eo amin’ny vidin’ny boky, hahazoana vokatra tsara any amin’ny varotra ho tombontsoan’ny rehetra.
Nanampy betsaka amin’
izao fanetsehana ny rohin’ny boky izao ny tetikasa “Res­sour­ces Educatives”, ary efa hatry ny ela izany. Mbola na­nohana ny dingana rehetra tamin’ny fandrafetana ny sa­tan’ny rohin’ny boky eto Ma­da­­gasikara koa. Nivoaka ta­min’ny tapany faharoa, ta­min’ny fihaonana, koa fa efa anatin’ny fanomanana ny « Tsenan’ ny boky » ny rehetra, ka efa tapaka fa hotontosaina ny 4 hatramin’ny 6 jona izao izany.

Zo ny Aina