Nosokafana tany amin’ny Nosy Boraha, na Sainte Marie, omaly hatramin’ny 4 jona izao, ny fankalazana tamin’ny fomba ofisialy, ny Andro iraisam-pirenena ho an’ny Tontolo iainana (JME).
Nitarika ny fotoana ny minisitry ny Tontolo iainana (Medd), Max Andonirina Fontaine, ny solombavambahoaka Imbiki Herilaza ary ny tomponandraikitra maro. Lohahevitra ny hoe : « Fanafoanana tanteraka ny fandotoan’ny fako plastika ny tontolo iainana ».
Nohamafisin’ny minisitra Andonirina M. Fontaine, fa nosafidiana manokana ny Nosy Boraha hankalazana ny JME, satria manana harena voajanahary miavaka ny any an-toerana. Toy ny fizahantany, ny fambolena, ny fiompiana, ny jono, ny taozavatra, … Zava-dehibe manokana ny hametrahana azy ho « Nosy tsy misy plastika ».
Tafiditra ao daholo ny mpisehatra voakasika rehetra, toy ny kaominina, ny fokontany 17, ny minisitera isan-tsokajiny, ny mpandraharaha ara-pizahantany, sns.
Nomarihiny fa tombanana ho 20 taonina isan-kerinandro ny fako ao an-tampon-tanànan’i Sainte -Marie. Miisa 6 000 isan-taona ny tavoahangy plastika avy amin’ny trano fiantranoana sy fisakafoana iray. « Azo ahodina ho vokatra hafa indray ireny akora plastika ireny », hoy ihany ny minisitra.
Efa voarain’ny minisitera ny antontan-taratasy mirakitra ny volavolan-dalàna ho Faritra Arovana an-tanety (AP) sy Faritra arovana an-dranomasina (APM) ny Nosy Sainte Marie.
Maro ny hetsika atao any an-toerana amin’izao fankalazana ny JME izao. Festival tao an-tampon-tanàna, fifaninanana « Question pour un champion », fanomezana fitaovana fanadiovana, fanapotehana fako, fitsidihana tranoheva, famelabelaran-kevitra, sns.
Njaka A.
French