Niditra an-keriny tao amin’ ny tokantrano iray manamorona ny lalamby teny Saropody, Tanjombato, ny alin’ny talata 15 jolay teo, tamin’ny 11 ora sy sasany ireo olon-dratsy. Nilanja fitaovam-piadiana, tsy nisy nisaron-tava izy ireo. Nitaky ny vola tao an-trano sy nangorona ny entana sarobidy toy ny fahitalavitra. Niezaka nanda ny tompon-trano ka nidaroka avy hatrany ireo lasibatra ireo mpandroba. Nokorontanin’ireo tsy mataho-tody ny efitrano. Voatery nanome ny vola tahiry mitetina 1 tapitrisa Ar ny lasibatra. Poa toy izay, nirohotra nivoaka ny trano ireo jiolahy. Niantso ny manam-pahefana avy hatrany ny niharan’ ny fandrobana. Nidina ifotony teny an-toerana ny polisim-pirenena avy eo anivon’ny boriborintany faharoa sy ny kaomisaria centrale Tanjombato. Naratra ny olona tao tamin’ilay trano ka voatery nentina eny anivon’ny HJRA. Tsy nisy nanapoaka fitaovam-piadiana ireo mpanao ratsy nandritra ny fanafihana, araka ny angom-baovao nataon’ny polisy.
Miroso amin’ny fikarohana ny nahavanon-doza ireto farany. Marihina, mirongatra ny fanafihan-jiolahy tato ho ato. Tokantrano iray hafa koa norobain’ny jiolahy teny Ankadikely Ilafy, ny marain’ny alakamisy 17 jolay teo, tamin’ny 3 ora maraina.
Tsiferana R.
French