Nisento tokana indray ireo mponina ao Toamasina taorian’ny fahafatesan’ireo jiolahy efatra raindahiny, afakomaly. Teo am-panaovana ny asa ratsiny ry zalahy no nifanehatra tamin’ny polisy.
Nirefodrefotra ny basy tao amin’ny fokontany Andranomadio, Toamasina parisela 11/43, afakomaly alina, nandritra ny fifampitifirana teo amin’ny polisin’ny Fip notarihan’ny kaomisera Lapely François, sy ireo jiolahy raindahiny. Mpanendaka sy mpamaky trano ao an-tsenan’Ambodivolo sy ny manodidina, hatrany amin’ny fokontany Andranomadio, ry zalahy ireto. Vao tapa-bolana lasa izay, tokantrano enina indray lasibatry ny asa ratsin’ireo jiolahy. Manoloana ny fitarainana nataon’ireo niharan’ny fanafihana, nametraka vela-pandrika ny polisy, nanomboka ny alarobia hariva teo. Nahitam-bokany izany satria sarona tao anaty fandrika nataon’ny polisy ireo jiolahy niaraka tamin’ny antsibe. Raikitra ny fifanjevoana satria nitsoaka ireo jiolahy telo raha vao nahita ny polisy. Tsy naharesy tosika ny polisy ry zalahy ka lavon’ny bala ny jiolahy efatra. Eo am-pikarohana ny naman’ireto efa-dahy voatifitra ireto kosa ny mpitandro filaminana. Nohamafisin’ny kaomisera Lapely François, fa mitohy ny fisafoana sy ny fidinana ifotony amin’ireo faritra mena ao Toamasina. Misy koa ny paikady manokana nataon’ny polisy amin’ny alalan’ny fametrahana ireo namany manao fanamiana sivily mody alefa irery milalao finday eny an-dalana. Toy ny fomba mahazatra ny fianakaviany hatrany, roa tamin’ny vadin’ireo jiolahy nanitrikitrika tao amin’ny Hopitalibe Toamasina fa tsy jiolahy velively izy ireo.
Sajo/J.C
French